Qazaqstannyń qurlyq áskerleriniń daıyndyǵy qandaı

ASTANA. QazAqparat – Qorǵanys mınıstrliginiń aptalyq «Online-brıfıng» baǵdarlamasyna suhbat bergen Qurlyq áskerleri áskerı ınstıtýty oqý bóliminiń basshysy Bolat Qudabaev kýrsanttardyń daıyndyǵy men mınıstrlik qoıǵan talaptar týraly baıandady.

Onyń málimdeýinshe, búginde oqý ornynyń aldynda turǵan maqsat - kásiptik deńgeıi joǵary áskerı mamandardy daıarlaý, dep habarlaıdy QazAqparat tilshisi.

«Qorǵanys mınıstri Rýslan Jaqsylyqov bizge naqty tapsyrma qoıdy. Ol joǵary áskerı oqý oryndaryna úlken nazar aýdaryp jatyr. Jalpy, tapsyrmalar bizdiń oqý-ádistemelik bazamyzǵa baılanysty. Sony damytý, kúsheıtý kerek. Sonymen qatar, professorlyq quramnyń biliktiligin arttyrý, ádistemelik sheberligin kóterý máselesi de bar. Mınıstr talap qoıyp jatyr. Ol – bizdiń túlekterdiń kásiptik daıyndyǵy joǵary bolýy kerek. Erteń áskerge barǵan kezde olar urysty uıymdastyra bilýi kerek», - dedi oqý bóliminiń basshysy.

Onyń aıtýynsha, atalǵan ınstıtýt 30-dan astam oqý oryndarymen jáne ǵylymı ortalyqtarmen áriptestikte jumys isteıdi. Budan ózge, bilim ordasy taıaýda Ǵylym jáne joǵary bilim mınıstrliginiń ǵylymı zertteýler júrgizý úshin bólinetin 3 grantyn utyp alǵan.

«Qazir bizdiń oqý ornynda ǵylymı zertteýler júrgizilip jatyr. Sondaı-aq, jalpy 4 jyl oqýdy bitirgennen keıin bizdiń túlekterimizge alǵashqy ofıtserlik shen beriledi. Odan keıin Qorǵanys mınıstrliginiń buıryǵymen bular áskerge barady. Tolyq jumys ornymen qamtamasyz etiledi», - dep toqtaldy Bolat Qudabaev.

Aıta keteıik, bul oqý ornyn osy kezge deıin 10 myńnan astam ofıtser támamdap, onyń 83-i general joǵary áskerı shenin alǵan.