Qazaqstannyń qorǵanys salasyndaǵy ónerkásip óndirisi 11% ósti

NUR-SULTAN. QazAqparat - Qazaqstan Respýblıkasy Indýstrııa jáne ınfraqurylymdyq damý mınıstri tehnologııalyq damý máseleleri boıynsha qorǵanys ónerkásibi blogynyń esebin tyńdady.

Sondaı-aq 2020 jyldyń óndiristik qorytyndylary shyǵarylyp, 2021 jylǵa mindetter qoıyldy, dep habarlaıdy QazAqparat QR Inýstrııa jáne ınfraqurylymdyq damý mınıstrliginiń Telegram arnasyna silteme jasap.

Jalpy alǵanda, qorǵanys ónerkásibi kesheninde qazirgi ekonomıkalyq jaǵdaıda óndiristik turaqtylyǵy saqtalyp, ónerkásiptik óndiris kólemi 11% ósti. Onyń ishinde azamattyq maqsattaǵy ónim óndirý kóleminiń ulǵaıýy esebinen (32,7%) qamtamasyz etildi.

«Qorǵanys ónerkásibi quramynda joǵary kásibı ınjenerlik-tehnıkalyq kadrlardyń jáne qazirgi zamanǵy jabdyqtardyń bolýy 2021 jyly da áýe qurylysy salasynda, zymyrandyq-artıllerııalyq qarý-jaraq, saýytty tanktik qarý-jaraq óndirisinde, medıtsınalyq jabdyqtar, kompıýterlik tehnıka, baılanys quraldary, sondaı-aq munaı jabdyqtary men temir jol salasyna qajetti ónimder óndirisinde jaqsy kórsetkishterdi saqtaýǵa múmkindik beredi»,-delingen habarlamada.