Qazaqstannyń kómir eksporty 2,1 esege artqan

NUR-SULTAN. QazAqparat – Jeti aıdyń ishinde bıýdjettik uıymdar men qarapaıym turǵyndar 4,5 mln tonna kómir satyp alǵan. Bul týraly QazAqparat Energyprom.kz saıtyna silteme jasap habarlaıdy.

«Qańtar-shilde aralyǵynda Qazaqstan boıynsha 66,4 mln tonna taskómir, lıgnıt jáne kómir kontsentraty óndirilgen. Onyń 92,6%-y taskómir – 61,5 mln tonna. Bul 2021 jyldyń alty aıymen salystyrǵanda 5,8% kóp.

Qazylǵan kómirdiń 39 mln tonnasy Pavlodar oblysyna tıesili. Munda óndiris kólemi byltyrǵydan 5% kóp. Al Qaraǵandy oblysynyń úlesine 21,3 mln tonna tıesili», - dep jazady Energyprom.kz.

Analıtıkalyq resýrstyń jazýynsha, qazylǵan taskómirdiń 30%-ǵa jýyǵy, ıaǵnı 16,4 mln tonnasy (457,4 mln dollar) eksportqa ketken. Eksport kólemi byltyrǵydan 20,8%, aqshalaı eseptegen 2,1 ese artqan.

«Qazaqstan kómirin ımporttaýshy elderdiń basym bóligi TMD aıasyndaǵy memleketter. 16,4 mln tonnanyń 10,9 mln tonnasyn (156,2 mln dollar) satyp alǵan. Onyń 62,2%-y Reseı Federatsııasyna ketken. Odan keıin Qyrǵyz Respýblıkasy men Ózbekstan eńiri ımporttaýshy bolyp otyr.

TMD-dan tys elderdiń ishinde Shveıtsarııa 3,7 mln tonna kómir satyp alǵan.

QR Indýstrııa jáne ınfraqurylymdyq damý mınıstrliginiń jospary boıynsha, eldiń kómir tutyný kólemi 9,6 mln tonnaǵa jetedi. Onyń ishinde 2,6 mln tonnasy kommýnaldyq-turmystyq salaǵa tıesili. Al 7 mln tonnasyn halyq tutynady. 7 aıdyń ishinde halyq pen bıýdjettik uıymdar 4,5 mln tonna túsirip alǵan», -dep jazylǵan saraptamada.