Qazaqstannyń kıeli jerlerin tirkeýge shyqqan ekspedıtsııa Almatyǵa keldi
Ǵalymdar barlyǵy 3000 shaqyrymdy júrip ótip, Almaty oblysynyń tarıhı-mádenı eskertkishterin jáne kıeli oryndary jaıly maǵlumat jınap keldi.
«Memleket basshysynyń kıeli jerleriniń kartasyn jasaý týraly usynysy óte oryndy. Óıtkeni, bizdiń saparymyzda týrızm salasynyń qarqyndy damyp jatqanyn kórdik. Bizdiń saparymyzda Almaty oblysynyń, qalasynyń tarıhı mádenı nysandaryn aralap, sýretke túsirip, naqty geografııalyq koordınattaryn túsirdik. Atap aıtqanda, qala boıynsha 30 nysan, oblys boıynsha 29 nysan kartaǵa engizildi», - dedi Qazaq ǵylymı zertteýler jáne mádenıet ınstıtýtynyń bas sarapshysy Túgelbaı Baqbergenov.
Ǵalymdar ataqty «Esik qorǵandary» mýzeı-qoryǵy, Kólsaı, Qaıyńdy, Sharyn, Jarkent meshiti, Altynemel, Alakól, Taldyqorǵandaǵy mýzeı, teatr taǵy basqa nysandarda boldy.
Kartograf Vladıslav Mıheevtiń aıtýynsha, sapar barysynda eki kartaǵa maǵlumat jınaqtalǵan. Birinshisi, tarıhı -mádenı eskertkishter, kıeli oryndar kiretin karta bolsa, ekinshisi týrısterge arnalǵan vırtýaldy karta.
«Biz kóbine túnde júrip, kúndiz jumys jasadyq. Óıtkeni, keıbir nysandardy kúndizgi ýaqytta túsirý mańyzdy», - dedi Qazaq ǵylymı zertteýler jáne mádenıet ınstıtýtynyń bas sarapshysy Túgelbaı Baqbergenov.
10 kúnnen soń ekspedıtsııa músheleri Qazaqstannyń basqa da óńirlerine attanady.
Aıta ketý kerek, Memleket basshysy N. Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda kóterilgen mindetterdi júzege asyrý boıynsha Ulttyq komıssııa jasaqtalǵan bolatyn.
Ulttyq komıssııa otyrysynda kıeli jerlerdiń jaı-kúıin anyqtaý úshin ǵylymı ekspedıtsııa shyǵatyndyǵy naqtylanǵan bolatyn.