Qazaqstannyń kıbershabýylmen kúrestegi tájirıbesi halyqaralyq deńgeıde joǵary baǵalandy

NUR-SULTAN. QazAqparat - Memlekettik tehnıkalyq qyzmet Cybersecurity Alliance for Mutual Progress (CAMP) ózara ilgerileýge arnalǵan kıberqaýipsizdik alıansynyń jyl saıynǵy konferentsııasynda júldeli orynǵa ıe boldy.

14-20 qyrkúıek aralyǵynda CAMP músheleriniń jyl saıynǵy besinshi konferentsııasy ótti. Onda qatysýshy eldermen áriptestik sheńberinde aqparattyq qaýipsizdik máseleleri talqylandy.

Jıynda sondaı-aq 2019-2020 jyldardaǵy aqparattyq qaýipsizdik ıntsıdentteriniń asa mańyzdy oqıǵalary taldandy. Bıyl COVID-19 pandemııasyna baılanysty uıymdastyrýshylar is-sharany onlaın formatta ótkizý týraly sheshim qabyldady.

Alıanstyń ár qatysýshysyna óz elin tanystyrýǵa jáne kıberqaýipsizdik jaǵdaıy týraly aıtýǵa múmkindik berildi.

Qazaqstan atynan memlekettik tehnıkalyq qyzmettiń departament dırektory Medet Ysqaqov sóz sóılep, Qazaqstannyń pandemııa kezeńinde kıbershabýylǵa qarsy kúrestegi tájirıbesin bólisti.

Bizdiń spıkerdiń sózi CAMP qatysýshy 47 eldiń ishinde «Best Speaker» nomınatsııasynda úzdik dep tanyldy.

Esterińizge sala keteıik, ótken jyly Qazaqstan CAMP uıymdastyrý komıtetiniń quramyna kirip, uıymdastyrý komıtetiniń tizimin on elge deıin tolyqtyrdy.

CAMP (Cybersecurity Alliance for Mutual Progress) Ońtústik Koreıada jumys isteıdi, onyń quramyna 46 elden 60 uıym kiredi.

Alıansty kıberqaýiptiń aldyn alý úshin jahandyq uıymǵa aınaldyrý maqsatynda CAMP músheleri barǵan saıyn kúrdelene túsetin jáne búkil álem boıynsha paıdalanýshylar men uıymdardy kóbirek qozǵaıtyn kıberqaýipsizdik máseleleri boıynsha oqý baǵdarlamalarymen jáne aqparatpen almasý múmkindigine ıe.

Foto: businessfm.kz