Qazaqstannyń kıberqaýipsizdigi: Sheteldik dıplomattar men kompanııalar Úkimette usynystaryn aıtty
Qazaqstannyń kıberkeńistigin damytý perspektıvalary jáne jaǵdaıy týraly baıandamalaryn jáne atalǵan saladaǵy saıasatty jetildirý jónindegi usynystaryn QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev, ishki ister mınıstriniń orynbasary Alekseı Kalaıchıdı, Qazaqstandaǵy AQSh elshisi Ýılıam Mozer, Kanada elshisi Nıkolıa Brýsso, Nıderlandy elshisi Andre Karstens, Ulybrıtanııa elshisi Maıkl Gıfford, Eýropalyq odaq isi boıynsha senimdi ókil Ramýnas ıAnýshaýskas, sondaı-aq Ericsson, Microsoft, Honeywell, Citibank, Mastercard kompanııalarynyń ókilderi jasady.
«2017 jyly «Tsıfrlyq Qazaqstan» memlekettik baǵdarlamasy iske qosylǵan sátten bastap, kapıtal men aldyńǵy qatarly tehnologııalar aǵynynyń arqasynda energetıka, kólik, aýyl sharýashylyǵy jáne qyzmet kórsetý salalarynda eleýli jetistikterge qol jetkizildi. Bul ulttyq ekonomıka ósiminiń mańyzdy faktoryna aınaldy», — dedi A. Mamın.
Osy jyldyń 9 aıynda Qazaqstannyń JІÓ 4,3% ósti. Sonymen birge, ósimniń negizgi úlesi qosylǵan quny joǵary salalar men qyzmetterge tıesili. Halyqaralyq valıýta qory men Azııa damý banki 2019-2020 jyldarǵa arnalǵan QR ekonomıkalyq ósiminiń boljamyn kóterdi. Dúnıejúzilik ekonomıkalyq forýmnyń Jahandyq básekege qabilettilik ındeksindegi Qazaqstannyń pozıtsııasy 59-orynnan 55-orynǵa jaqsardy.
«Oń serpindi odan ári qamtamasyz etý úshin ekonomıkamyzdy halyqaralyq jáne jergilikti kıberqylmystyń artyp kele jatqan syn-tegeýrinderinen qorǵaý úshin barynsha kúsh salý kerek. Dúnıejúzilik ekonomıkalyq forýmnyń boljamdaryna sáıkes, 2022 jylǵa qaraı kıberqylmys saldarynan álemdik ekonomıkaǵa keltirilgen zalal $8 trıllıonnan asýy múmkin», — dedi Premer-Mınıstr.
Úkimet basshysy otyrys qatysýshylaryna kıberqylmysqa qarsy turý úshin Tuńǵysh Prezıdent Nursultan Nazarbaevtyń tapsyrmasy boıynsha «Qazaqstannyń kıberqalqany» kıberqaýipsizdik tujyrymdamasy ázirlengenin aıtty. Ony iske asyrý aıasynda normatıvtik-quqyqtyq baza jetildirildi, Aqparattyq qaýipsizdiktiń ulttyq úılestirý ortalyǵy jáne Kıberqaýipsizdik máseleleri jónindegi keńes quryldy, halyqtyń tsıfrlyq saýattylyq deńgeıi 73% deıin artty.
«Osy atalǵan sharalardyń nátıjesinde Halyqaralyq elektrbaılanysy odaǵy Qazaqstannyń Jahandyq kıberqaýipsizdik ındeksindegi ornyn 2018 jyly 40-orynǵa deıin kóterdi. Al oǵan deıin bir jyl buryn biz 83-orynda boldyq», — dedi A. Mamın.
Premer-Mınıstr Investıtsııalyq ahýaldy jaqsartý jónindegi keńestiń quramyna kiretin shet memleketterdiń ókilderin kıberqaýipsizdikti qamtamasyz etý salasynda tyǵyz yntymaqtastyq ornatýǵa shaqyrdy.