Qazaqstannyń keıbir zańnamalary syrtqy jáne ishki týrızmniń damýyna tusaý bolyp otyr - sarapshy
«Memleket basshysynyń 10 memleketpen arada bir jaqty vızasyz rejimdi engizý týraly bastamasy óte quptarlyq is. Bul bizdiń elge keletin týrıster aǵymynyń artýyna septigin tıgizdi. Biraq, buǵan qaıshy keletin birneshe zańnama bar. QR Úkimetiniń 2014 jylǵy 16 sáýirdegi «Shekaralyq jolaqty, karantın jolaǵyn,shekaralyq aýmaqty belgileý» týraly qaýlysy soǵan mysal bola alady. Osy qaýlyǵa sáıkes bizdiń kóptegen kórikti jerlerimiz atalǵan aýmaqqa kirip tur», - dedi R.Shaıkenova.
Onyń aıtýynsha, búginde Almaty oblysyndaǵy eń tanymal Sharyn shatqaly, Úlken Almaty kóli, Alakól jerlerine kelý úshin sheteldik týrıster kóshi-qon polıtsııasynan ruqsat qaǵaz alý kerek.
Qujatty rásimdeý úshin 10 kún ketedi.
«Kóptegen ekotýrıster Qazaqstanǵa kelerde týrıstik fırmalardyń qyzmetine júginbeıdi. Ol ruqsat qaǵaz alam degenshe, demalys ýaqyty da bitedi. Sondyqtan, bul syrttan keletin týrısterdi tartýǵa edáýir kedergi bolary sózsiz», - dedi R.Shaıkenova.
Sondaı-aq, Qazaqstanda týrısterdi túngi ýaqytta tasymaldaýǵa tyıym salynǵan.
«Eger, kúndiz jetetin jerge túnde júrmese, bir kúni jolǵa ketedi. Joldamanyń baǵasy artyp ketedi. Kún ystyq, yńǵaısyz. Bolashaqta bul tyıym alynyp tastalýy kerek. Áıtpese, ishki týrızmniń damýyna tusaý bolady»,- dedi ol.