Qazaqstannyń kedendik organdary birinshi toqsanda 160-tan astam qylmystyq is qozǵady

ASTANA. QazAqparat - Bıylǵy jylǵy birinshi toqsanda Qazaqstannyń kedendik organdary 160-tan astam qylmystyq is qozǵady. Bul týraly búgin Astanada ótken baspasóz máslıhatynda QR QM KBK Kontrabandaǵa qarsy kúres basqarmasy anyqtaý bóliminiń bastyǵy Erden Juma málim etti.

«Bıylǵy birinshi toqsanda Qazaqstan Respýblıkasynyń keden organdary 164 qylmystyq is qozǵap, osy boıynsha taýarlardyń jalpy quny 4 mlrd. teńgeden asty. Tólenbegen kedendik tólemder men salyqtar túrindegi zalal kólemi 1,5 mlrd. teńgeni qurady», - dedi ol.

E. Jumanyń sózine qaraǵanda, atalǵan merzimde 2,2 myń ákimshilik is qozǵalyp, osy oraıda memleketke keltirilgen zalal somasy 511 mln. teńgeden asty.

«Esirtki jáne psıhotropty zattardyń 21 zańsyz aınalymy faktisiniń joly kesilip, 33 qylmystyq is qozǵaldy. Tárkilengen esirtki zattarynyń jalpy salmaǵy 5 kelini qurap, onyń ishinde 3 kelisi - geroın», - dedi ol.