Qazaqstannyń Keden odaǵy memleketterimen aýyl sharýashylyǵy taýarlarynyń aınalymy 41 paıyzǵa artty
Búgin Astanada «Jahandaný jaǵdaıynda Qazaqstannyń agroónerkásip keshenin ekonomıkalyq damytýdyń ózekti máseleleri» atty taqyryptaǵy konferentsııa barysynda S. Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaev osylaı málim etti.
Degenmen, rektordyń aıtýynsha, bul kórsetkishtiń ósimi negizinen Qazaqstanǵa ımporttyń artýy esebinen oryn alyp otyr. «Máselen, Kedendik baqylaý komıtetiniń málimetterine qaraǵanda, sońǵy 4 jylda Keden odaǵy elderinen keletin aýyl sharýashylyǵynyń óńdelgen ónimderi 1,5 mlrd. dollarǵa, ıaǵnı 2 esege deıin artqan. Bul rette qazaqstandyq eksport 0,78 mln. dollar deńgeıinde ózgerissiz qalǵan. Al bundaı jaǵdaıda aýyl sharýashylyǵyn damytýǵa jiti nazar aýdaryp, otandyq óndirýshi sektordyń básekege qabilettiligin arttyrǵan mańyzdy», - dedi A. Kúrishbaev.