Qazaqstannyń keden beketinde Ózbekstan azamatynan aýdıo-vıdeo jazbalardy jasaıtyn qol saǵattar men túımeler tabyldy

ASTANA. 14 qarasha. QazAqparat - Ústimizdegi jyldyń 25 qazany kúni «Qaplanbek» keden beketinen ótý barysynda Qazaqstan Respýblıkasynan Ózbekstan Respýblıkasyna bet alǵan Ózbekstan Respýblıkasy, Tashkent qalasynyń turǵyny, 1980 jyly týǵan T. esimdi azamat ustaldy.

Onyń qol júgin rentgen (RAPISSAN) aparaty arqyly kedendik tekserý júrgizý kezinde Qazaqstan Respýblıkasynyń aýmaǵyna alyp kelýge tyıym salynǵan jáne tıisti kedendik rásimdeýden ótpegen: aýdıo-vıdeo jazbalaryn jasaıtyn qurylǵysy ornatylǵan temir bilezikti qol saǵattyń 6 danasy; aýdıo-vıdeo jazbalaryn jasaıtyn qurylǵysy ornatylǵan rezeńkeli bilezikti qol saǵattyń 5 danasy; aýdıo-vıdeo jazbalaryn jasaıtyn qurylǵysy ornatylǵan  jáne 4 GB-tyq mıkrofleshkasy bar túımeniń 2 danasy, sondaı-aq elektrmen eseńgiretetin elektroshokerlerdiń 8 danasy tabyldy.

OQO boıynsha UQK Aqparattyq júıeler qyzmeti 1-shi ortalyǵy basqarmasynyń qorytyndysyna sáıkes, elektroshokerden basqa atalǵan taýarlar arnaıy-tehnıkalyq qurylǵylar bolyp tabylady.

Atalǵan fakt boıynsha jınaqtalǵan is-qujattar odan ári ishki ister organdaryna joldaný úshin jáne protsessýaldyq sheshim qabyldaný úshin OQO prokýratýrasyna jóneltildi.