Qazaqstannyń qazirgi jaǵdaıynda et eksportyna qatysty Elbasynyń tapsyrmasyn oryndaý qıynǵa soǵyp tur - N. Nyǵmatýlın
Búgin «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta ótken Parlamenttik tyńdaýda sóz sóılegen Májilis spıkeri Nurlan Nyǵmatýlın osylaı málimdedi.
Jıyndy ashý barysynda spıker talqyǵa túsken máseleniń ekonomıkalyq máni ǵana emes, áleýmettik qyrlary da asa mańyzdy ekenin aıtyp, aýyl sharýashylyǵy taýarlaryn óndirý men eksporttaý eldiń jalpy ishki ónimine tikeleı baılanysty ekenin málim etti. «Qazirgi tańda Qazaqstanda jalpy ishki ónimniń qurylymyndaǵy aýyl sharýashylyǵy ónimderiniń qunyna shaqqanda mal sharýashylyǵynyń úlesi 52 paıyzdan asady. Degenmen, elimizdiń et ımportyna qatysty statıstıkalyq málimetter kóńildi kónshiter emes. Ásirese, qus eti 60 paıyzdan asady. Іri qara mal etiniń ımporty da artyp keledi: tórt jyl buryn bul kórsetkish on bir myń tonnadan sál ǵana assa 2012 jyly bul 20 myń tonnaǵa jetken. Sońǵy bes jylda jylqy etiniń ımporty da artyp keledi. Máselen, 2007 jyly jylqy etiniń ımporty múldem bolmaǵan bolsa, 2012 jyly bul 5,8 myń tonnany qurady», - deıdi spıker N. Nyǵmatýlın.
«Importtyń mundaı úlesi turǵanda, Memleket basshysynyń ettiń eksporttyq áleýetin 2016 jylǵa qaraı jylyna 60 myń tonnaǵa jetkizý týraly tapsyrmasyn oryndaý úlken másele bolyp qala beredi», - dedi spıker.