Qazaqstannyń qaı óńirinde ınflıatsııa órship tur – Ulttyq bank málimetteri

NUR-SULTAN. QazAqparat - 2022 jylǵy qańtarda elde jyldyq ınflıatsııa 8,5% bolyp (2021 jylǵy jeltoqsanda – 8,4%), jedeldedi. Aımaqtar boıynsha jyldyq ınflıatsııa 10 óńirde qarqyn aldy, 5 óńirde baıaýlasa, 2 oblysta ózgerissiz qaldy.

Bul týraly QazAqparat QR Ulttyq bankiniń Aqsha-kredıt saıasaty departamenti naqty sektor monıtorıngi basqarmasynyń bastyǵy Igor Osıpovtyń 2022 jylǵy qańtardaǵy QR óńirlerindegi ınflıatsııalyq úrdister ge qatysty málimetterine silteme jasap habarlaıdy.

Inflıatsııanyń asa qarqyn alý kórsetkishi Aqtóbe oblysynda (jeltoqsandaǵy 8,7%-dan qańtarda 9,2%-ǵa deıin) tirkeldi, kerisinshe, baıaýlaý úrdisi Mańǵystaý oblysy (9,2%-dan 8,7%-ǵa deıin) men astanada (8,8%-dan 8,3%-ǵa deıin) baıqaldy.

Qańtarda azyq-túlik taýarlary baǵasynyń ósý qarqyny bir aı burynǵy 9,9%-dyq deńgeıde saqtaldy. Osy toptaǵy taýarlar baǵasynyń eń joǵary ósimi Aqmola oblysynda qalyptasty (11,7%).

Azyq-túlikke jatpaıtyn taýarlar baǵasynyń ósimi de óz mánin 8,5%-dyq deńgeıde saqtady. Eń joǵary mánder Aqmola men Aqtóbe oblystarynda (10,2%-dan), eń tómen mán Mańǵystaý oblysynda (7,1%) tirkeldi.

Aqyly kórsetiletin qyzmettiń baǵasy qańtarda 6,8%-ǵa ósti (jeltoqsanda - 6,5%), bul rette jalpy respýblıkalyq deńgeıden baǵa birshama joǵary – Batys Qazaqstan jáne Shyǵys Qazaqstan oblystarynda (8,2%-dan), birshama tómen – Aqmola oblysynda (5,3%).

Elde aılyq ınflıatsııa 0,7%-dy qurady, bul sońǵy 5 jylda qańtardaǵy baǵanyń ortasha máninen joǵary (2017-2021 jyldary: 0,6%). Ortasha tarıhı normasynan joǵary baǵa 2022 jylǵy qańtarda Almaty qalasynda (1,0%), Aqtóbe (0,9%), Qaraǵandy (0,9%) oblystarynda, Shymkent qalasynda (0,9%), Aqmola (0,8%), Batys Qazaqstan (0,7%) jáne Soltústik Qazaqstan oblystarynda (0,6%) ósti.

Mańǵystaý, Atyraý, Pavlodar jáne Qostanaı oblystarynda baǵanyń ósý qarqyny óziniń ortasha tarıhı normasyn saqtap qaldy. Qalǵan óńirlerde baǵanyń aılyq ósý qarqyny óziniń ortasha normasynan tómen qalyptasty.