Qazaqstannyń qaı óńirinde azyq-túlik baǵasy sharyqtap tur

NUR-SULTAN. QazAqparat – El boıynsha jańadan qurylǵan Jetisý oblysynyń ortalyǵy Qonaev qalasynda azyq-túlik baǵasy qymbat. Bul týraly Ulttyq statıstıka bıýrosy málim etti, dep habaraıdy QazAqparat tilshisi.

Bıýronyń deregi boıynsha, barlyq áleýmettik mańyzy bar azyq-túlik baǵalary eń qymbat óńir – Qonaev qalasy. Onda nan 314 teńge turady.

Al nan respýblıka boıynsha astyqty aımaq Qostanaı qalasynda arzan. Onda nan - 152 teńgeden satylyp jatyr.

Qonaev qalasynda kúnbaǵys quny da sharyqtap tur. Lıtri – 954 teńge. Atalǵan taýar túri Semeıde arzan. Onda kúnbaǵys maınyń bir lıtri – 725 teńge.

Basqa óńirlermen salystyrǵanda Jetisý oblysynyń ortalyǵynda kartop (kelisi 186 teńge) pen qyryqqabat (kelisi 89 teńge) qana arzan.

Al sıyr eti (kelisi 2369 teńge), kúrish (kelisi 375 teńge), pııaz (kelisi 311 teńge) jáne jumyrtqa (10 danasy 460 teńge) sııaqty azyq-túlik taýarlarynyń barlyǵy qymbat.

Statıstıkalyq málimetterge sáıkes, basqa óńirlermen salystyrǵanda elimizdiń 3 qalasynda azyq-túlik quny edáýir arzan. Olar - Petropavl, Qaraǵandy jáne Qostanaı qalalary.

Atalǵan aımaqtarda azyq-túlik baǵasy ózge óńirlerge qaraǵanda 95-210 teńgege tómen.

Ulttyq statıstıka bıýrosynyń aqparaty boıynsha, jyl basynan beri áleýmettik mańyzy bar azyq-túlik baǵasy 17,6 paıyzǵa ósken.

Eske sala keteıik, buǵan deıin Májilis depýtaty Amanjan Jamalov ınflıatsııa men azyq-túlik baǵasynyń ósýine baılanysty másele kótergenin jazǵan edik.