Qazaqstannyń Qatarǵa eksporty 250 mln dollarǵa deıin artady - Úkimet

ASTANA. QazAqparat - Qatar memleketiniń Ámiri sheıh Tamım ben Hamad Al Tanıdiń Qazaqstanǵa resmı sapary aıasynda Qazaqstan Respýblıkasy Premer-Mınıstriniń orynbasary – Saýda jáne ıntegratsııa mınıstri Serik Jumanǵarın men Qatar memleketiniń saýda jáne ındýstrııa mınıstri Mohammed ben Hamad Al Tanı ózara túsinistik týraly memorandýmǵa qol qoıdy, dep habarlaıdy QazAqparat.

Taraptar eki eldiń saýda salasyndaǵy yntymaqtastyqty ózara tıimdi jáne teń quqyly negizde damytýǵa jáne nyǵaıtýǵa járdemdesý nıetin bekitti. Atap aıtqanda, qujat shıkizattyq emes taýarlar men qyzmetter eksportyn damytý men ilgeriletýdi, saýda ınfraqurylymyn jetildirýdi, bırjalyq saýdany jáne elektrondyq kommertsııany damytýdy, memlekettik jáne jeke sektorlar arasyndaǵy dıalogqa járdemdesýdi, isker toptardyń, qaýymdastyqtar men bıznes-qaýymdastyqtardyń ózara qyzyǵýshylyq týdyratyn máseleleri boıynsha yntymaqtastyǵyna járdemdesýdi jáne basqa da baǵyttardy aıqyndaıdy.

«Taýar aınalymyn ulǵaıtý jónindegi sharalar retinde bizdiń eksport qurylymyn ártaraptandyrýdy júrgizýge bolady dep sanaımyz. Orta merzimdi perspektıvada qazaqstandyq óńdelgen ónimniń Qatarǵa eksportyn $250 mln-ǵa deıin, onyń ishinde aýyl sharýashylyǵy taýarlary boıynsha $68 mln-ǵa deıin arttyra alamyz. Bizde Birikken Arab Ámirlikterine et pen sýbónimderdi jetkizýde oń tájirıbe bar. Biz Katar naryǵyna et jáne et ónimderin eksporttaýdy arttyrýǵa daıynbyz», - dedi Serik Jumanǵarın.

Sonymen qatar standarttaý, sáıkestikti baǵalaý jáne metrologııa salasyndaǵy yntymaqtastyqty halyqaralyq qaǵıdattar men normalar negizinde nyǵaıtý maqsatynda QR Saýda jáne ıntegratsııa mınıstrligi men Qatardyń standarttaý jónindegi bas uıymy arasynda ózara túsinistik týraly memorandýmǵa qol qoıyldy.

Qazaqstanda halyqaralyq standarttarǵa negizdelgen jáne álemdik jetekshi halal ónimder naryǵyna baǵdarlanǵan sapa ınfraqurylymynyń jańa júıesin qurý búgingi tańda BAÁ elderimen saýda salasyndaǵy mańyzdy mindetterdiń biri sanalady.

2022 jyly qyrkúıekte QR Saýda jáne ıntegratsııa mınıstrliginiń «QazStandart» halal ónimderin sertıfıkattaýdy júrgizý úshin BAÁ halyqaralyq akkredıtteý ortalyǵynan akkredıtatsııa aldy. Bul Qazaqstannyń eksporttyq áleýetin iske asyrýǵa jáne Parsy shyǵanaǵy elderiniń naryǵyna qaýipsiz jáne sapaly ónim jetkizýge múmkindik beredi.

Foto: primeminister.kz