Qazaqstannyń Kaspıı arqyly júk tasymaldaý úlesi 40 paıyzǵa jetip qaldy

ASTANA. QazAqparat - Qazaqstannyń Kaspıı teńizindegi júk tasymaldaý úlesi shamamen 37 paıyzdy quraıdy. Bul týraly búgin Úkimettiń selektorlyq rejimdegi otyrysynda «Nurly jol» baǵdarlamasyn iske asyrý máseleleri jóninde baıandaǵan QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.

«Sý kóligi salasynda Quryq portyn damytý sharalary júzege asty. Qýattylyǵy 4 mln tonna bolatyn temir jol termınaly jáne bıyl qýaty 2 mln tonna bolatyn avtomobıl baılanysy iske qosyldy. Nátıjesinde, Aqtaý men Quryq porttarynyń ótkizý qabileti 19,5 mln tonnadan 25,5 mln tonnaǵa deıin artty»,-  dedi Jeńis Qasymbek.

Mınıstrdiń dereginshe, qazirgi ýaqytta Quryq portynyń jańa paromdyq termınaldary arqyly halyqaralyq Transkaspıı baǵytynda 23 myńnan astam vagon men avtokólikter nemese shamamen 3 mln tonna júk tasymaldanǵan.

«Búgingi kúni Qazaqstan Respýblıkasynyń Kaspıı teńizindegi júk tasymaldaý úlesi shamamen 37 paıyzdy quraıdy»,-  dedi ol.