Qazaqstannyń kásipodaq qozǵalystary usaqtalyp ketti - Eńbek mınıstri

ASTANA. QazAqparat - Qazaqstannyń kásipodaq qozǵalystary usaqtalyp ketken. Búgin Parlament Májilisinde ótip jatqan Qazaqstan kásipodaqtaryn jetildirý taqyrybyndaǵy konferentsııa barysynda Eńbek jáne halyqty áleýmettik qorǵaý mınıstri Tamara Dúısenova osylaı málim etti.

«Búgingi tańda qazaqstandyq kásipodaq qozǵalysy tym usaqtalyp ketti. Máselen, is júzinde jumyspen qamtylǵan 8,4 mln. halyqtyń tek 30 paıyzy ǵana nemese 2,5 mln. adam osyndaı qozǵalysqa birigip otyr. Buǵan qosa, búgingi ishki naqty jaǵdaıymyz de ózgerdi, elimizdiń áleýmettik-ekonomıkalyq damýy qaǵıdatty túrdegi mindetterdi sheshýde. Al osydan on jyldan astam buryn qabyldanǵan «Kásiptik odaqtar týraly» zań buǵan eshqandaı da jaýap bere almaı keledi», - dedi mınıstr T. Dúısenova.

Osyǵan oraı, mınıstr elimizde «Kásiptik odaqtar týraly» jańa zań qabyldaý ýaqyty jetkenin alǵa tartady. Al jańa qujatta kásiptik qozǵalystardyń álemdik tájirıbesin negizge alýǵa bolady. «Bul rette halyqaralyq tájirıbeni, Halyqaralyq eńbek uıymynyń uıǵarymdary men Qazaqstandaǵy kásiptik odaqtardy ınstıtýtsıonaldyq jáne qurylymdyq shuǵyl jańǵyrtý eskerile kele jańa zań jobasy ázirlenip otyr. Onyń negizi etip, áleýmettik áriptestik ınstıtýtynyń yqpalyn nyǵaıtýǵa baǵyttalǵan «kúshti áriptes» modelin alýdy usynamyz», - dedi T. Dúısenova.