Qazaqstannyń Qarýly Kúshteri dabyl boıynsha kóterildi

ASTANA. QazAqparat - Búgin tańerteń QR Qorǵanys mınıstri Nurlan Ermekbaevtyń buıryǵy boıynsha Qarýly Kúshterdiń áskerı bólimderi men quramalary oqý-jattyǵý dabyly boıynsha kóterildi. Bul týraly Qorǵanys mınıstrliginiń baspasóz qyzmetinen málim etti.

Selektorlyq rejımde keńes ótkizilip, onyń barysynda «Shyǵys» jáne «Ońtústik» óńirlik qolbasshylyqtarynyń, Desanttyq-shabýyldaý áskerleriniń birqatar áskerı bólimderine Qazaqstannyń batys óńirine toptasý tapsyrmasy berildi. Áskerler batys aımaqqa jaıaý jáne temirjol kóligimen, sondaı-aq áskerı-kólik avıatsııasynyń ushaqtarymen attandy.

Al «Batys» óńirlik qolbasshylyǵy áskerleriniń qolbasshysyna áskerlerdi oqý-jattyǵý ótetin orynǵa ornalastyrý jáne oqý-jaýyngerlik tapsyrmalardy oryndaý úshin «Shyǵys» jáne «Ońtústik» óńirlik qolbasshylyqtarynyń, Desanttyq-shabýyldaý áskerleriniń kelip jatqan bólimderi men bólimshelerin eskere otyryp, toptardy qurý tapsyrmasy júkteldi.

Maıdandyq jáne shabýyldaý avıatsııasy - áýe aılaqtarda, al áskerı avıatsııa dalalyq tikushaq aılaqtarynda shoǵyrlandy. Áskerı-teńiz kúshteriniń toptamasy QR UQK Shekara qyzmetiniń kemelerimen jáne katerlerimen kúsheıtildi. Sonymen qatar, shalǵaıdaǵy shekara zastavalary jalpyáskerı bólimshelermen kúsheıtildi.

Oqý-jattyǵýǵa Qurlyq áskerleriniń, Áýe qorǵanysy kúshteriniń, Áskerı-teńiz kúshteriniń, Arnaıy operatsııalar kúshteriniń, arnaıy áskerlerdiń, materıaldyq-tehnıkalyq qamtamsyz etý bólimderi men mekemeleriniń, UQK Shekara qyzmeti bólimsheleriniń, QR ІІM Tótenshe jaǵdaılar komıteti jáne Ulttyq ulannyń 5 myńnan astam áskerı qyzmetshisi qatysýda.