Qazaqstannyń qant ımportyna táýeldiligi óte joǵary - AShM

ASTANA. QazAqparat – Otandyq ónimmen naryqtyń 40%-yn ǵana jaýyp otyrmyz. Bul týraly OKQ-de ótken brıfıngide AShM Agrarlyq azyq-túlik naryqtary jáne aýyl sharýashylyǵy ónimin qaıta óńdeý departamentiniń dırektory Qanat Jaýymbaev aıtty, dep habarlaıdy QazAqparat tilshisi.

«Qazaqstannyń qant ımportyna táýeldiligi óte joǵary. Ózimizdiń otandyq ónimmen naryqtyń 40%-yn ǵana jaýyp otyrmyz. Al eger shıkizatty alatyn bolsaq, onda ishki naryqtyń tek 10%-yn qant qyzylshasymen qamtamasyz etemiz. Demek, bizdiń naryqtyń 60%-y ıportqa táýeldi. Árıne, qant Qazaqstanǵa Reseı men Bearýstan tasymaldanady», - dedi Qanat Jaýymbaev.

Departament dırektorynyń málimdeýinshe, bıyl qant qyzylshasyn egýge arnalǵan alqaptardyń kólemi ulǵaıtylǵan.

«Bıyl Úkimet qant ónerkásibin damytý boıynsha keshendi jospardy qabyldady. Ol 33 pýnktiden turady. Biraq, keıbir pýntiler boıynsha áli de talqylaýdy qajet etetin máseleler bar. Desek te, keshendi jospardy oryndaý boıynsha qazirgi kezde nátıje joq emes. Onyń biri – egis alqaptaryn ulǵaıtý. Máselen, bıyl qant qyzylshasyn egýge arnalǵan jer kólemi 10,1 myń gektardan 16,1 myń gektarǵa keńeıtildi», - dep toqtaldy departament dırektory.

Qanat Jaýymbaevtyń aıtýynsha, elge ıporttalatyn qantqa salynatyn qosymsha qun salyǵynyń mólsheri tómendetilgen. Sonymen qatar, atalǵan taýar túrin óndiretin zaýyttarǵa beriletin sýbsıdııa kólemi artqan. Máselen, buǵan deıin qanttyń 1 kılogramyna 15 teńge sýbsıdııa tólenetin bolsa, bıyldan bastap 25 teńge boldy.