Qazaqstannyń qansha azamaty shetelde isti boldy

ASTANA. QazAqparat - Parlament Senatynyń jalpy otyrysynda «Qazaqstan Respýblıkasy men Iordan Hashımıt Koroldigi arasyndaǵy qylmystyq ister boıynsha ózara quqyqtyq kómek týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Qazaqstan men Iordanııa arasyndaǵy atalǵan kelisim 2017 jyldyń qarashasynda Astanada bekitildi.

Zań jobasynyń negizgi maqsaty - ýaǵdalasýshy memleketterdiń qylmystyq ister boıynsha tergeý jumystary, qylmystyq qýdalaý jáne sot talqylaýlaryn júrgizýde kómek kórsetýi.

«Eki el arasyndaǵy yntymaqtastyq aıtarlyqtaı joǵary deńgeıde. Qazirgi kezde qorǵanys ónerkásibi, farmatsevtıka, aýyl sharýashylyǵy jáne energetıka salasynda belsendi ózara is-qımyldar iske asyrylýda. Atalǵan kelisim standartty qujat, sondaı-aq osyndaı kelisimder 25 elmen jasaldy. Qazirgi mundaı qujattardy Kýbamen, Grekııa jáne Makedonııa elderimen bekitý jumystary pysyqtalýda», - dedi QR Bas prokýrorynyń orynbasary Andreı Lýkın.

Kelisim kúdiktiler men aıyptalýshylardyń kinásin dáleldeý úshin qajetti tergeý áreketterin júrgizýdi kózdeıdi. Sonymen qatar, quqyqtyq kómek kórsetýdiń sharttary men tártibi jáne odan bas tartýdyń negizderi aıqyndalǵan.

Senator Vladımır Volkovtyń sózine qaraǵanda, búginde Qazaqstan kóptegen elderdiń týrısteri úshin tartymdy bolyp kele jatyr, sondaı-aq elimiz azamattarynyń shetelge saparlary da jıileýde.

«Ulttyq ekonomıka mınıstrliginiń málimetinshe, 2018 jyldyń 1 qazandaǵy jaǵdaı boıynsha Qazaqstanǵa 195 elden 6,8 mln sheteldik kelgen. Onyń ishinde Iordanııanyń 616 azamaty bar. Adamdar shetelge shyqqanda túrli jaǵdaılarǵa tap bolyp jatady. Osy oraıda bul salada quqyqtyq retteýdiń qajettigi artyp keledi», - dedi depýtat.

V. Volkovtyń aıtýynsha, resmı statıstıka boıynsha qazirgi kezde Qazaqstannyń 947 azamaty shetelde sotty bolǵan. Al 1 169 sheteldik Qazaqstanda sottaldy. Olardyń barlyǵy quqyqtyq kómekke muqtaj ekendigi túsinikti.