Qazaqstannyń kadastrlyq aqparaty kez kelgen adamǵa qoljetimdi

NUR-SULTAN. QazAqparat – Qazaqstannyń kadastrlyq aqparaty kez kelgen azamatqa qoljetimdi. Bul týraly QR Aýyl sharýashylyǵy mınıstrliginen málim boldy, dep habarlaıdy QazAqparat tilshisi.

«Qazaqstan Respýblıkasynyń Prezıdenti Qasym-Jomart Toqaev qol qoıǵan «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zańyna sáıkes, bıyldan bastap Qazaqstanda onlaın rejımde aýyl sharýashylyǵy jer ýchaskeleriniń qandaı ekonomıkalyq qyzmet sýbektilerine jatatynyn qadaǵalaýǵa múmkindik paıda boldy. http://aisgzk.kz/ adresi boıynsha ornalasqan memlekettik jer kadastrynyń avtomattandyrylǵan aqparattyq júıesiniń (MJK AAJ) ınternet-resýrsynda barlyq negizder men normatıvtik quqyqtyq aktilerdi kórsete otyryp, jer ýchaskesin alǵan sýbektiler týraly tolyq aqparat ashyq kórsetilgen», - delingen mınıstrlik málimetinde.

Júıeni engizýdegi negizgi maqsat - jeke jáne zańdy tulǵalarǵa, memlekettik organdar men mekemelerge kadastrlyq aqparatty usynýdyń yńǵaıly jáne fýnktsıonaldyq tásilin iske asyrý.