Qazaqstannyń iri kásiporyndarynda ozyq qoljetimdi tehnologııalar qalaı engiziledi

NUR-SULTAN. QazAqparat - QR Ekologııa, geologııa jáne tabıǵı resrýstar mınıstri Maǵzum Myrzaǵalıev Qazaqstannyń iri kásiporyndarynda ozyq qoljetimdi tehnologııalardy engizý josparymen bólisti, dep habarlaıdy QazAqparat tilshisi.

«Ekologııalyq jaǵdaıdy jaqsartýdyń naqty múmkindigi – ol ozyq qoljetimdi tehnologııalardy (OQT) engizý bolyp sanalady. Bul úshin ónerkásiptik kásiporyndar tehnologııalyq aýdıtten ótedi, onyń aıasynda shyǵaryndylardyń kólemin azaıtýǵa múmkindik beretin tehnologııalar anyqtalatyn bolady. Áreket etetin iri lastaǵyshtar úshin ozyq qoljetimdi tehnologııalarǵa kóshýdi kezeń-kezeńmen júrgizý usynylady», - dedi mınıstr Májiliste jańa Ekologııalyq kodeks jobasyn tanystyra otyryp.

Onyń sózine qaraǵanda, birinshi kezeńde munaı-gaz, taý-ken-metallýrgııa, hımııa jáne elektr energetıkasy salalarynan eldegi shyǵaryndylarynyń 80 paıyzy tıesili 50 iri kásiporyndy OQT-ǵa kóshirý josparlanyp otyr. 2023 jyldyń sońyna deıingi kezeńde keshendi tehnologııalyq aýdıt negizinde OQT-nyń salalyq anyqtamalyqtary ázirlenetin bolady.

2024-2025 jyldary OQT anyqtamalarynyń negizinde keshendi ekologııalyq ruqsattardy berý josparlanýda.

«Kásiporyndar 10 jyl boıy ekologııalyq tıimdilik baǵdarlamasyna sáıkes OQT-ny endiretin bolady. Bul rette ozyq qoljetimdi tehnologııany engizgen kásiporyndar emıssııa úshin tólemnen bosatylady. Eger olar OQT-ǵa kóshpese, olardyń emıssııa úshin tólem stavkalary ósedi. Tıisinshe, bul tyıym salý emes, yntalandyrý tetigi», - dep túsindirdi Myrzaǵalıev.

Onyń aıtýynsha, OQT-ny endirýdiń úlgisi retinde eýropalyq elderdiń tájirıbesin alýǵa bolady, onda lastaýshy zattar shyǵaryndylarynyń kólemi edáýir qysqartylǵan. Atap aıtqanda, azot totyǵy (NO2) – 69 paıyzǵa, kúkirt totyǵy (SO2) – 94 paıyzǵa, shań/qatty bólshekter – 94 paıyzǵa tómendedi.