Qazaqstannyń Iranǵa eksporty keńeıýi múmkin

ASTANA. QazAqparat - Máskeýdegi ekinshi Kaspıı ekonomıkalyq forýmy alańynda Qazaqstan Premer-Mınıstri Álıhan Smaıylov pen Irannyń Birinshi vıtse-prezıdenti Mohammad Mohber ekijaqty yntymaqtastyqty nyǵaıtý perspektıvalaryn talqylady.

Bul týraly QazAqparat Úkimettiń resmı saıtyna silteme jasap habarlaıdy.

«Iranmen tatý kórshilik qatynastardy damytý – Qazaqstannyń syrtqy saıasattaǵy basymdyqtarynyń biri»,-delingen saıttaǵy málimette.

Sondaı-aq onda ótken jyly eki el arasyndaǵy taýar aınalymy 85,1%-ǵa ósip, $441 mln-dy quraǵany aıtylǵan. Qazirgi ýaqytta Qazaqstannan Iranǵa eksport 154 taýar pozıtsııasy boıynsha júzege asyrylady. Bul rette Úkimet osy nomenklatýrany keńeıtý jóninde usynys daıyndap jatyr.

Qazaqstan aýyl sharýashylyǵy salasyndaǵy áriptestikti damytýǵa jáne azyq-túlikpen ózara qamtamasyz etýdi ulǵaıtýǵa úlken mán beredi.

«Eki eldiń agroónerkásip óniminiń taýar aınalymyn 1 mlrd dollarǵa deıin ulǵaıtýǵa múmkindigi bar. Osy mindetti iske asyrý úshin kólik dálizderin jáne aýyl sharýashylyǵy taýarlaryn ózara jetkizýdi pysyqtap jatyrmyz», — dedi Álıhan Smaıylov.