Qazaqstannyń Iran, Qytaı, Vetnam jáne Mysyrmen saýda kólemi artýda

NUR-SULTAN. QazAqparat – Qazaqstan kásiporyndary Iran, Qytaı, Vetnam jáne Mysyr elderimen saýda-sattyq kólemin arttyrdy. Bul týraly Qazaqstannyń qant, tamaq jáne qaıta óńdeý ónerkásibi qaýymdastyǵynyń prezıdenti Aıjan Naýryzǵalıeva málim etti, dep habarlaıdy QazAqparat tilshisi.

Bishkekte ótip jatqan birinshi Eýrazııa ekonomıkalyq forýmǵa qatysqan qaýymdastyq basshysy aldymen, sońǵy eki jyldyń halyqaralyq saýdaǵa aýyr tıgenin atap ótti.

Onyń aıtýynsha, pandemııa jáne álemdegi geosaıası jaǵdaı Qazaqstannyń syrtqy saýda belsendiligine áserin tıgizdi.

«Qytaı tarapynan shekteý sharalary bizdiń elimiz úshin úlken kedergi boldy. 2020 jyldan bastap Qazaqstan Úkimeti ótkizý beketteriniń jumysyn jaqsartý úshin Qytaı tarapymen dıalog júrgizdi. Qazir kóptegen kásiporyn Iran, Qytaı, Vetnam jáne Mysyrda taýar ótkizýdiń qosymsha naryǵyn izdestirip jatyr. Jalpy, bizdiń elder olardy eksport múmkindikterin arttyrý úshin áleýetti seriktes retinde qarastyryp otyr. Sońǵy eki jylda dál osy eldermen jańa pisken jáne keptirilgen jemis pen kókónis ónimderine, muzdatylǵan jáne salqyndatylǵan et pen tamaq ónimderiniń barlyq assortımentine qatysty saýdanyń ósýi baıqalady», - dedi Aıjan Naýryzǵalıeva Eýrazııa ekonomıkalyq forýmda.

Sondaı-aq qaýymdastyq basshysy Qazaqstanda qant qyzylshasynyń sorttaryn aýdandastyrý baǵytyndy qazaqstandyq jáne reseılik ǵalymdardyń birlesip jumys istep jatqanyn habarlady.

Spıkerdiń málimdeýinshe, Reseı Federatsııasymen ekonomıkalyq baılanystardyń keńeıýine qaramastan, qazirgi ýaqytta jetkizý ýaqyty uzartyldy.

Aıta keteıik, búgin Bishkekte birinshi Eýrazııa ekonomıkalyq forým ótip jatyr.

Atalǵan sharaǵa Qazaqstan atynan bir top delegatsııa bardy.