Qazaqstannyń ınjenerlik-saperlik jasaǵy Irakta 4 mıllıonnan astam mınany joıǵan
Eske salaıyq, palata otyrysynda «Táýelsiz Memleketter Dostastyǵyna qatysýshy memleketterdiń qarýly kúshteri ınjenerlik áskerleriniń gýmanıtarlyq mınasyzdandyrý salasyndaǵy yntymaqtastyǵy týraly kelisimdi ratıfıkatsııalaý týraly» QR Zańy qabyldandy.
Kelisimge 2014 jyldyń 30 mamyrynda Mınsk qalasynda qol qoıylǵan. Qujat boıynsha mınasyzdandyrý saladaǵy ınjenerlik áskerler yntymaqtastyǵynyń negizgi baǵyttary men qaǵıdattary aıqyndalady. Sonymen qatar, kelisim ınjenerlik áskerlerdiń jaýyngerlik is-qımyldar bolǵan aýdandardan tys jerlerde ózara is-qımyldy arttyrýǵa baǵyttalǵan is-sharalardy júrgizýin qarastyrady. Aıta keterligi, gýmanıtarlyq mınasyzdandyrý áskerı yntymaqtastyqtyń asa mańyzdy aspektisi bolyp tabylady. Onyń mańyzdylyǵy - beıbit turǵyndardy jarylý qaýpi bar zattardan qorǵaý men mınalanǵan aýmaqtardy tazalaý qajettiligimen dáleldenedi.
Toqtala ketetin jaıt, Qorǵanys mınıstriniń orynbasary Talǵat Muhtarovtyń sózine qaraǵanda, qazir álemdegi jaǵdaı boıynsha 110 mıllıonǵa deıin mına ornalastyrylǵan. Jyl saıyn onyń 1 mıllıonnan astamy qaıta jasyrylsa, apta saıyn álemde 680-ge jýyq mına jarylady.
«TMD elderin alatyn bolsaq, 1999 jyldan beri tek Tájikstanda jarylý qaýpi bar zattardan 846 adam zardap shekken. Onyń 368-i qaza tapsa, 478-i jaraqat aldy. Olardyń otyz paıyzy balalar. Aıta keterligi, 2003-2008 jyldar aralyǵynda Qazaqstannyń ınjenerlik-saperlik jasaǵy Irakta 4 mıllıonnan astam mınany joıǵan. Bul jaǵdaı Qazaqstan Respýblıkasynyń halyqaralyq arenadaǵy bedelin arttyrdy»,-dedi T.Muhtarov. Onyń aıtýynsha, kelisimdi qabyldaý arqyly Qazaqstan áskerı ınjenerleriniń kásibı biliktiligin arttyrýǵa múmkindik bolady. Jalpy qujat aıqyn belgilengen baǵyttarǵa ıe jáne ony júzege asyrý TMD aýmaǵyndaǵy qaýipsizdikti kúsheıtip, QR Qarýly kúshteriniń tájirıbesi men kásibı deńgeıin arttyrady.
Parlament qabyldaǵan zań Memleket basshysynyń qol qoıýyna joldanady.