Qazaqstannyń ınvestıtsııalyq áleýeti qandaı

ASTANA. QazAqparat - Búginde elimizde qolaıly ınvestıtsııalyq klımat qalyptasty. Máselen, sońǵy 5 jyl ishinde Qazaqstanǵa jyl saıyn 20 mlrd dollardan astam ınvestıtsııa tartylǵan. Jahandy jaılaǵan pandemııaǵa baılanysty 2020 jyly tikeleı sheteldik ınvestıtsııa (TShI) kólemi azaıǵanymen, 2021 jyly qaıta qalpyna kelip, 23,7 mlrd dollardy quraǵan. Al ótken jyly TShI kólemi 27 mlrd dollarǵa jetip, 17,8%-ǵa ósim kórsetti. Investıtsııalyq saıasattyń jańa tujyrymdamasyna sáıkes, TShI kóleminiń jyl saıynǵy aǵyny 2026 jylǵa qaraı 25,5 mlrd dollardy quraýy tıis. Qazirgi tańda elimizge ınvestıtsııa salatyn elder qatarynda Nıderland, AQSh, Shveıtsarııa, Qytaı, Belgııa, Ulybrıtanııa sekildi ekonomıkasy damyǵan alpaýyt memleketter bar.