Qazaqstannyń halyqaralyq rezervi azaıdy

NUR-SULTAN. QazAqparat – QR Ultyq bankiniń tóraǵasy Ǵalymjan Pirmatov eldiń halyqaralyq rezervteri men Ulttyq qor túsimderi týraly aıtyp berdi, dep habarlaıdy QazAqparat.

«Jalpy halyqaralyq rezerv 31 naýryzda 85,9 mlrd dollardy qurady. Ulttyq Banktiń altyn-valıýta aktıvteri jyl basynan beri valıýtalyq ınterventsııalar, ekinshi deńgeıdegi bank shottaryndaǵy qaldyqtardyń jáne syrtqy borysh boıynsha tólemderdiń tómendeýi esebinen 1,2 mlrd dollarǵa tómendep, 33,2 mlrd dollardy qurady», - dedi Ǵ. Pirmatov Úkimet otyrysynda.

Onyń aıtýynsha, Ulttyq qordyń aktıvteri 52,7 mlrd dollar boldy. Respýblıkalyq bıýdjetke 1 trln 36 mlrd teńge transfertter bólý úshin bıylǵy birinshi toqsanda

2,1 mlrd dollarǵa valıýtalyq aktıvter satyldy.

«Munaı baǵasynyń aıtarlyqtaı ósýinen Ulttyq qorǵa túsimder ótken jyldyń osy kezeńimen salystyrǵanda 4 esege ulǵaıyp, jyl basynan beri 1 trln 59 mlrd teńgeni qurady, onyń ishinde valıýtalyq túsimder 1,9 mlrd dollar nemese 845 mlrd teńge bolǵan. Ulttyq qordyń kiristiligi qurylǵan sátten 31 naýryzǵa deıin jyldyq kórsetkishte 3,45% bolady. Sońǵy 5 jáne 10 jyldaǵy kiristilik jyldyq kórsetkishte tıisinshe 3,41% jáne 2,09% boldy», - dep túsindirdi Ǵ. Pirmatov.

Buǵan deıin Ulttyq bank basshysy teńge baǵamy naýryzdaǵy qubylmalyqtan keıin nyǵaıyp jatqanyn aıtqan edi.

Qazaqstanda iskerlik belsendilik ındeksi teris kórsetkishke aýysty jáne jyl boıy syrtqy ınflıatsııalyq jaǵdaı da qolaısyz bolady.