Qazaqstannyń halyqaralyq kásipodaqtar federatsııasyndaǵy músheligi qalpyna keltirildi

ASTANA. QazAqparat – Halyqaralyq kásipodaqtar konfederatsııasynyń Bas keńesi Qazaqstan Respýblıkasynyń Kásipodaqtar federatsııasyndaǵy músheligin qalpyna keltirý týraly sheshim qabyldady. Bul týraly QRKF tóraǵasy Satybaldy Dáýletalın málim etti, dep habarlaıdy QazAqparat QR Kásipodaqtar federatsııasynyń medıaortalyǵyna silteme jasap.

QR Kásipodaqtar federatsııasynyń delegatsııasy Avstralııanyń Melbýrn qalasynda ótip jatqan Halyqaralyq kásipodaqtar konfederatsııasynyń V kongresine qatysyp jatyr.

«HKK Bas keńesiniń otyrysynda QR Kásipodaqtar federatsııasynyń Halyqaralyq kásipodaqtar konfederatsııasyna músheligi týraly másele qaraldy. Kásipodaqtar federatsııasynyń HKK-ge músheligin qalpyna keltirý týraly sheshim qabyldandy! Degenmen, elimizdegi birlestikter bostandyǵyn qamtamasyz etetin zańnamalyq reformalardyń júzege asyrylýy mańyzdy», - dedi Satybaldy Dáýletalın.

17-22 qarashada 300-den astam ulttyq kásipodaq ortalyqtarynyń delegattary aldaǵy tórt jylǵa arnalǵan Dúnıejúzilik kásipodaqtar qozǵalysynyń kún tártibin talqylaıdy.

Kongress qatysýshylary múshe-elderdegi turaqtylyqty saqtaý boıynsha usynystar kórsetiletin «Jańa áleýmettik kelisimshart» málimdemesin qabyldaýǵa nıetti. Málimdeme jobasyna sáıkes, talqylaý jańa áleýmettik kelisimshart taqyrybyna: «jasyl» jumys oryndary, jumyskerlerdiń quqyqtary, ádiletti jalaqy, áleýmettik qorǵaý, teńdik jáne ınklıýzıvtilikke arnalady.

Aıta ketsek, Halyqaralyq kásipodaqtar konfederatsııasy – 161 elden 176 mıllıon adam kiretin álemdegi eń iri kásipodaq birlestigi. 2018 jyly Qazaqstan Respýblıkasy Kásipodaqtar federatsııasynyń HKK-ge músheligi toqtatylǵan bolatyn.