Qazaqstannyń halyq ártisi R.Rymbaeva mamyrdyń 1-i kúni Astanada Jeńistiń 65 jyldyq mereıtoıyna arnap qaıyrymdylyq kontsert beredi
Bul týraly búgin «Báıterek» medıa-ortalyǵynda ótken baspasóz máslıhatynda málim boldy.
Beıbitshilik jáne kelisim saraıynda ótetin kontserttiń basty kórermenderi - elordalyq ardagerler, zeınetkerler men qarttar úıiniń turǵyndary bolady. Estrada ánshisi QR-na eńbek sińirgen qaıratker Qanat Ahmetovtyń dırıjerlik etýindegi Astana qalalyq Memlekettik fılarmonııasy sımfonııalyq orkestriniń súıemeldeýimen jıyrma án oryndaıtyn bolady. Olardyń arasynda ánshiniń shyǵarmashylyq jolyna bastaý bergen «Álııa» áni, Qazaqstan týraly ánder, Keńes Odaǵy kompozıtorlarynyń, jalpy aq saqaldy atalarymyz ben aq jaýlyqty analarymyzǵa etene tanys retro-shlıagerler shyrqalady. Mereke Jeńistiń kúnine arnalyp otyrǵandyqtan, baǵdarlamada patrıottyq ánder de kóp bolady. Jańa ánderdiń ishinde B.Momyshulynyń 100 jyldyǵyna arnalǵan Gúlnur Ómirbaevanyń «Batyr Baýyrjan» áni bar.
R.Rymbaevanyń aıtýynsha, kórermender qosylyp aıtý úshin, kópshilikke tanymal bul ánder ádeıilep tańdap alynǵan, sondaı-aq onyń paıymdaýynsha, árbir ánshiniń repertýarynda mindetti túrde patrıottyq ánder bolýy kerek.
Halyq ártisi qaıyrymdylyq kontsertterin jıi beretinin aıta kele: «Keleshekte osyndaı kontsertterdi aqyly ótkizip, túsken qarajatty balalar úıine, soǵys ardagerleri mekemesine ne bolmasa qarttar úıine berý máselesi jaıynda oılanýǵa bolady», - dedi.
Aıta keteıik, bul kontsert R.Rymbaevanyń sońǵy bes jyldan bergi Astananyń tórindegi birinshi jeke kontserti. Ánshi óziniń shyǵarmashylyq qyzmetiniń 30 jyldyǵyna arnalǵan kontsertti 2005 jyly Kongress-Holl saraıynda bergen edi.
Halyq súıiktisi óziniń Uly Jeńistiń 65 jyldyǵyna arnalǵan kontserttik baǵdarlamasymen elordadan keıin, mamyrdyń 2,3 kúnderi Óskemende, 5-i kúni Máskeýde, 8,9-y kúnderi Oral qalasynda bolady.