Qazaqstannyń gýmanıtarlyq kómegi tıelgen úshinshi reıs Sırııaǵa jetti

AMMAN. QazAqparat – Qazaqstannyń gýmanıtarlyq kómegi bar úshinshi ushaq dúısenbi kúni keshke Aleppo áýejaıyna qondy. Ushaqpen QR Ulttyq ulanynyń avıatsııasy birge keldi jáne kómekti Azyq-túlik qaýipsizdigi jónindegi ıslam uıymy arqyly úlestirdi, dep habarlaıdy QazAqparat tilshisi uıymǵa silteme jasap.

Azyq-túlik qaýipsizdigi jónindegi ıslam uıymynyń (IOFS) ókilderi, onyń ishinde uıymnyń bas dırektory Erlan Baıdáýlet qazir Aleppoda.

Olar júkti qarsy alyp, ony taratýǵa qatysyp jatyr.

Ótken aptada QR Prezıdenti joıqyn jer silkinisinen zardap shekken Sırııaǵa gýmanıtarlyq kómek jiberýdi tapsyrǵan bolatyn.

Kómek memlekettik materıaldyq rezervten jasaqtaldy. Jalpy alǵanda, Sırııaǵa 50 tonna gýmanıtarlyq júk joldandy, onda konserviler, jyly kıim, qysqy shatyrlar, kereýetter men tósek-oryn jabdyqtary bar.

«Biz gýmanıtarlyq kómek taratý ortalyǵynda boldyq, onda Dúnıejúzilik azyq-túlik baǵdarlamasynyń jáne Sırııanyń Qyzyl Kres ókilderimen birge onyń bir bóligin jergilikti halyqqa tarattyq», - dedi IOFS Twitter-de.

Bul zilzaladan zardap shekken Sırııa turǵyndaryna Qazaqstan tarapynan jiberilgen úshinshi ushaq. Bul bortqa azyq-túlik artylǵan.

Buǵan deıin eki gýmanıtarlyq kómek tıelgen ushaq Sırııaǵa shatyrlar men kórpeler jáne zardap shekkenderge qajet basqa zattardy ákeldi.

Birinshi júk Aleppo áýejaıyna 10 aqpan keshke keldi.

Tapsyrý rásimine Aleppo gýbernatorynyń orynbasary, áýejaı dırektory, Sırııa Qyzyl Kresiniń ókilderi jáne Qazaqstannyń Lıvandaǵy elshisi qatysty.

Sońǵy, tórtinshi gýmanıtarlyq kómek artylǵan reıs Sırııaǵa bir kúnnen keıin keledi.

Foto: IOFS