Qazaqstannyń EXPO-2020 kórmesindegi pavılonyna qansha qarajat jumsaldy

NUR-SULTAN. QazAqparat - Dýbaıdaǵy Dúnıejúzilik EXPO-2020 kórmesine qoıylatyn Qazaqstan pavılonyna 9 mlrd teńge jumsaldy. Bul týraly QR saýda jáne ıntegratsııa mınıstri Baqyt Sultanov aıtyp berdi, dep habarlaıdy QazAqparat tilshisi.

«Buǵan deıin Dýbaıdaǵy Qazaqstannyń pavılonyn ázirleý jumystary júrgizildi, oǵan bıýdjetten 9 mlrd teńge bólindi. Bul qarajat esebinen bizdiń pavılon keıinirek Qazaqstan aýmaǵyna jetkiziledi jáne elordada nemese óńirlerde otandyq ónimdi tanystyrý boıynsha qyzmet ete beredi», - dep jaýap berdi mınıstr QR Prezıdenti janyndaǵy Ortalyq kommýnıkatsııalar qyzmetinde tilshi suraǵyna.

Aıta keteıik, Dúnıejúzilik EXPO kórmesi Taıaý Shyǵysta birinshi ret ótkeli otyr jáne ony 25 mln adam tamashalaıdy dep kútilýde. Kórme 2020 jyldyń 20 qazanynan 2021 jyldyń 10 sáýiri aralyǵynda «Bolashaq úshin sana-sezimdi biriktirý» taqyrybynda ótedi. Onyń ishinde «Múmkindik», «Mobıldilik» jáne «Turaqtylyq» uǵymdaryna basa mán berilmek.

Kórme kesheni «úsh japyraq» pishininde usynylǵan, onyń dıametri 150 metrdi quraıtyn ortalyq nysany «Ál-Vasl» plazasy dep atalady. Ortalyq nysan janynda Birikken Arab Ámirlikteriniń pavılony men 3 taqyryptyq klaster ornalasady. EKSPO kesheniniń jalpy aýmaǵy 438 gektardy quraıdy. Onda 150 ga bolatyn kórme aýmaǵy, jerústi metro stansasy, «Dubai South Mall» saýda ortalyǵy, turǵyn úıler, logıstıkalyq jáne qonaq úı nysandary bar.