Qazaqstannyń et eksportyna qaýip tónip tur
Bul týraly búgin «Qazaqstannyń et odaǵy» birlestiginiń tóraǵasy Maqsut Baqtybaev kezekten tys sezde málim etti.
Onyń aıtýynsha, aǵymdaǵy jyldyń mamyr aıynan beri Aqtóbe, Atyraý jáne Qaraǵandy oblystaryndaǵy maldyń pasterellezden qyrylý saldarynan Reseı tarapy elimizden ákelinetin et pen et ónimderine shekteý salǵan. Bundaı shekteýden otandyq eksporttýshylar 3 mıllıard teńgege jýyq yqtımal tabysynan aıyrylyp otyr. Budan bólek, Qaraǵandy jáne Pavlodar oblystaryndaǵy sibir jarasyna qatysty faktiler jaǵdaıdy ýshyqtyra túsipti.
«Qazaqstannyń aýyl sharýashylyǵyndaǵy jaıylymdar, mal basynyń ósimine qatysty basymdyqtary eskerile kele, jaqyn aralyqta Reseı men Qytaıǵa mıllıardtaǵan dollar ónimder eksporttalady dep josparlanǵan. Іri qara mal basyn asyldandyrý, osy baǵyttaǵy eksporttyq áleýetti arttyrý qolǵa alyndy. «Sybaǵa» baǵdarlamasy arqyly 12 myńǵa tarta usaq jáne shaǵyn sharýashylyqtar jeńildetilgen sýbsıdııalar alyp, mal basyn ósirdi. Alaıda, aǵymdaǵy oqıǵalar jaǵdaıdy ýshyqtyryp jiberdi. Biz osyny eskere kele, memleketten veterınarlyq baqylaýdy kúsheıtýdi suraımyz», - dedi odaq basshysy M. Baqtybaev.
Bul rette Qazaqstannyń et odaǵy jaıylymdaǵy maldy baqylaýdyń avtomattandyrylǵan júıesin engizýdi usynady. Sonymen qatar, jergilikti atqarýshy organdardyń bazarlardaǵy veterınarlyq baqylaýǵa, mal soıý alańdaryn tekserýge qatysty erejeni saqtaý boıynsha jaýapkershiligin arttyrý usynylady.
«Qazaqstannyń ishki naryǵy 100 paıyzǵa etpen qamtamasyz etilgen. Sondyqtan da eksporttyq áleýetti arttyrý úshin biz «Sybaǵa» arqyly qarajat quıa bastadyq. Endeshe, bizdiń qarajattyń qaıtarylymy da osy eksporttyń jandanýyna tikeleı baılanysty. Eger eksport bolmaı, naryq shyǵyndy bolsa, bizdiń kásiporyndarymyz da qaryzǵa batady, tólem qabilettiligi tómendeıdi. Sondyqtan da memleket eksporttyń ashylýyna basa nazar aýdarsa ıgi. Óıtkeni, qazaqstandyq et pen et ónimderine Reseı, Qytaı, Iran jáne Parsy shyǵanaǵynyń úlken suranysy ósip keledi», - dedi M. Baqtybaev.