Qazaqstannyń energetıkalyq kásiporyndaryna 200-den astam tekserý júrgizildi
«QR Energetıka mınıstrligi Atomdyq jáne energetıkalyq qadaǵalaý men baqylaý komıtetiniń aýmaqtyq departamentteri elektr energetıkasy salasyndaǵy normatıvtik quqyqtyq aktilerdiń saqtalýyna jospardan tys 220 tekserý júrgizdi. Tekserý qorytyndysynda 126 nusqama shyǵaryldy. Nusqamalardyń oryndalýy aýmaqtyq departamentterdiń baqylaýynda», - delingen atalǵan mınıstrlik taratqan aqparatta.
Vedomstvo málimetinshe, Nur-Sultan qalasy men Qaraǵandy oblysynda - 32-den, Pavlodar oblysynda - 29, al Qyzylorda oblysynda - 24 jospardan tys tekserý júrgizildi. Nátıjeleri boıynsha jalpy somasy 26 mln 37 myń teńgeni quraıtyn ákimshilik aıyppul salyndy. Onyń 23 mln 251 myń teńgesi memleket kirisine óndirildi. Baqylaý sharalary jeke jáne zańdy tulǵalardyń ótinishteri negizinde júzege asyryldy.
Sondaı-aq, esepti kezeńde elimizdiń energetıkalyq kásiporyndarynda 3 610 tehnologııalyq buzýshylyq tirkeldi. Onyń ishinde 3 apat, І-dárejeli 27 isten shyǵý jáne ІІ-dárejeli 3 580 isten shyǵý boldy.
«Komıtettiń aýmaqtyq departamentterine 698 ótinish, onyń ishinde jeke tulǵalardan 373, zańdy tulǵalardan 325 ótinish kelip tústi. Jeke jáne zańdy tulǵalardyń ótinishteriniń jalpy sany ótken jyldyń sáıkes kezeńimen salystyrǵanda 13,2 paıyzǵa tómendedi», - dedi mınıstrlikten.