Qazaqstannyń energetıka salasynda maman tapshylyǵy baıqalyp otyr

ASTANA. QazAqparat – Búgin Májilistiń jalpy otyrysynda jylýmen jabdyqtaý salasyndaǵy aýdıtorlyq is-sharanyń qorytyndysyn talqylaý kezinde Joǵary aýdıtorlyq palata tóraǵasy Natalıa Godýnova osy salada maman tapshyly bar ekenin aıtty, dep habarlaıdy QazAqparat tilshisi.

«Osy saladaǵy kásibı kadrlar basqa kásiporyndarǵa ketip jatyr. Máselen, Shahtınsk JEO personaly 77 paıyz deńgeıinde jasaqtalǵan, al negizgi tsehtar boıynsha bul kórsetkish 43% shamasynda», - dedi N. Godýnova.

Onyń aıtýynsha, energııa kásiporyndarynda kadrlardyń tapshylyǵyna tarıftik smetamen shektelgen jalaqynyń tómen deńgeıi erekshe áser etip otyr.

«2022 jyly elektr energııasymen qamtamasyz etý, gaz, bý jiberý salasyndaǵy mamandardyń ortasha aılyq jalaqysy 268 myń teńgeni nemese jalpy el boıynsha ortasha jalaqynyń 87%-yn qurady (308 myń teńge)», - dedi palata basshysy.

Budan buryn habarlanǵandaı, Joǵary aýdıtorlyq palata jylý energetıka salasynda ınvestıtsııalyq jobalar sapasyz iske asyrylyp jatqanyn anyqtady.

Astanadaǵy JEO-3 qurylysyna qatysty aýdıt kezinde ákimdik derekteri sáıkes kelmeıtini belgili boldy.

Sonymen qatar, Joǵary aýdıtorlyq palata jylýmen jabdyqtaý salasynda qarajatty tıimsiz ıgerý derekterin anyqtady.

Jylý berý salasyndaǵy memlekettik retteý birneshe memlekettik organǵa júktelgendikten, jylý energetıkasyn damytýda júıeli tásil joq.