Qazaqstannyń Eńbek Eri prezıdent saılaýy jóninde: Bári de halyq úshin
«Prezıdent saılaýynyń ótkizilýin óte durys qadam dep sanaımyn. Óıtkeni álemdik ózgeristerdiń, túrli oqıǵalardyń jıilep ketýi jaǵdaıynda Prezıdenttiń ókilettigi tolyq bolýy kerek. Saılaýǵa túsip, halyqtyń senimine ıe bolǵan tulǵalar ǵana aıryqsha kúrdeli sheshimderdi batyldyqpen qabyldaýǵa táýekel ete alady»,- dedi Saırambaı Dónenbaev.
Onyń aıtýynsha, Elbasy Nursultan Nazarbaev baıandy bolashaq úshin utymdy baılam jasaı aldy.
«Memleket basshysy Qasym-Jomart Toqaevtyń prezıdent saılaýyn kúzde nemese kelesi jylǵa qaldyrýǵa da quqy bar edi. Alaıda, ol taıaý arada saılaý ótkizip, Prezıdentti túpkilikti saılaý qajettigin aıtty. Bul óte oryndy is boldy. Óıtkeni Prezıdentti halyq saılaıdy, túpkilikti sheshimdi qabyldaıtyn da sol halyq. Endigi jerde saılaýdyń taza, ashyq, ádiletti ótýin qalaımyn. Bári de halyq úshin ǵoı»,- dedi ol.
Sondaı-aq, Eńbek Eri joǵary bılikke saılanǵan tulǵa halqyna Elbasy sekildi janashyrlyqpen, ádil de adal qyzmet etse, sóıtip búgingi kúni el aýmaǵynda Ult josparynyń, Joldaýlarda alǵa qoıylǵan mindetterdiń, túrli memlekettik baǵdarlamalardyń júzege asyrylýyn odan ári jemisti jalǵastyrsa degen tilegin jetkizdi.
«Jasyratyny joq, búgingi jaǵdaıymyz ótken ǵasyrdyń jetpisinshi jyldarymen salystyrǵanda áldeqaıda jaqsy. Aıyrmashylyǵy jer men kókteı. Aq, adal eńbek et te, tabys tap. Eńbek erkindigi bizge osyndaı múmkindik berip otyr. Buryn mundaı bolǵan joq. Mysaly, Keńestik kezeńde ókimet ár otbasyna bir sıyr, bes qoıdan artyq ustatpaıtyn. Al endi eki sıyr ustasań, bireýiniń buzaýyn salyqqa berýińe týra keletin. Taza júrip, tursa, halyq úshin eńbek etse, búginde árkimniń-aq baqýattylyqqa qol jetkizýine múmkindigi bar. Qazirgi ýaqytta jeke kásibińdi ashqyń kele me, ózindik bastama, ıdeıalaryń bar ma, basqa da kómekter qajet pe bárine de memleket tarapynan qoldaý kórsetilýde»,- degen iri sharýa qojalyq jetekshisi Saırambaı Dónenbaev el azamattaryn óz kásibin ashýǵa, osynaý eldiń mamyrajaı kúnin baǵalaýǵa shaqyrdy.
Eske sala keteıik, Qazaqstanda kezekten tys prezıdent saılaýy aldaǵy 9 maýsym kúni ótedi. Memleket basshysy Qasym-Jomart Toqaev respýblıkalyq telearnalar arqyly jasaǵan Úndeýinde saılaýdyń ashyq ári ádil ótetinine kepildik beretinin aıtty.