Qazaqstannyń eń úzdik memlekettik qyzmetshisi tańdalyp alynbaq
Bul týraly búgin OKQ brıfıngisinde Memlekettik qyzmet isteri jáne sybaılas jemqorlyqqa qarsy kúres agenttigi tóraǵasynyń orynbasary Aıgúl Shaıymova málim etti.
«Memlekettik qyzmetkerler kúni taıap qalǵany málim. Bıyl alǵash ret QR Prezıdenti Ákimishiliginiń qoldaýymen Qazaqstanda eń úzdik memlekettik qyzmetker baıqaýy jarııalandy. Úmitkerlerdi Prezıdent Ákimshiliginiń basshysy bastaǵan komıssııa iriktep aldy. Onyń quramyna memlekettik organ ókilderi ǵana emes, Parlament depýtattary, BUU DB, Atameken Ulttyq kásipkerler palatasy men qoǵam ókilderi kirgen. Baıqaýǵa barlyq deńgeıdegi memlekettik qyzmetkerler, onyń ishinde aýyldyq jáne aýdandyq deńgeıde qyzmet etip júrgen qyzmetshiler qatysty. Olardyń qatarynda «Bolashaq» stıpendıattary men memlekettik qyzmetshiler áýletteri de bar», - dedi A. Shaıymova.
Onyń aıtýynsha, baıqaýǵa qatysýshylar irikteýdiń eki kezeńinen ótken: esse jazý jáne komıssııa aldynda suxbat berý.
«Konkýrsanttar naqty jaǵdaılarda oryn alatyn mindetterdi sheshýdegi strategııalyq sheshim shyǵarý qabiletteri baǵalandy. Sońǵy kezeńde olar ózderiniń ómirlik jáne kásibı basymdyqtaryn pash etti», - dep atap ótti ol.
Baspasóz máslıxatynda xabarlanǵanyndaı, jeńimpazdar 23 maýsymda Memlekettik qyzmetkerler kúninde marapattalatyn bolady. Sharadan soń, olar QR Prezıdentiniń qabyldaýynda bolady. Jeńimpazdar Memleket basshysynyń maqtaý qaǵazyna jáne arnaıy tósbelgilermen marapattalady.