Qazaqstannyń eń úzdik bastaýysh kásipodaq uıymdary anyqtaldy

ASTANA. 6 jeltoqsan. QazAqparat - Búgin Astanada QR Kásipodaqtar federatsııasy jarııalaǵan «2012 jyl - bastaýysh kásipodaq uıymy jyly» sheńberinde «Kúshti bastaýysh uıym - kúshti kásipodaq» baıqaý konkýrsynyń jeńimpazdary marapattaldy.

Respýblıkalyq «Kúshti bastaýysh uıym - kúshti kásipodaq» sharasy eki kezeń boıynsha ótkizildi. Birinshi týrda elimizdiń barlyq óńirlerinen 18 myńnan astam bastaýysh kásipodaq uıymdary qatysty. Odan ótken 46 uıym baıqaýdyń ekinshi kezeńinde birneshe atalymdar boıynsha eń úzdik bastaýysh kásipodaq uıymy mártebesin sarapqa saldy. Baıqaý konkýrstyń Gran-Prı júldesi «Sokolov-Sarybaı» taý-ken-óndiristik birlestigi» AQ-nyń bastaýysh kásipodaq uıymyna berildi.

 QR Kásipodaqtary federatsııasynyń tóraǵasy Sııazbek Muqashevtiń aıtýynsha, bul joba Qazaqstannyń búkil kásipodaqtar qozǵalysyna jańa serpin berdi, Kásipodaqtar federatsııasynan bastap, árbir bastaýysh kásipodaq uıymy úshin úlken synaq boldy.

 «Sizderdiń tájirıbelerińiz eldegi kásipodaqtar qozǵalysynyń jetistigi bolyp tabylady. Biz 20 jylda kóptegen súrleýden, aýyr kezeńderden óttik. Búgin sol eńbegimizdiń jemisin tatatyn kún týdy. Qıynshylyǵy men aýyrtpalyǵy mol bastaýysh kásipodaqtar uıymynyń jumysyn atqaryp kele jatqan eń úzdik mamandardyń osynaý forýmy alǵash ret ótkizilip otyr. Sizder Qazaqstannyń tutas kásipodaqtar qozǵalysynyń brendi bolyp tabylasyzdar», - dedi S.Muqashev jeńimpazdardy marapattaý rásiminde.

 Qazirgi tańda elde kásipodaq uıymdaryna 2 mıllıonnan astam adam múshe. 26 respýblıkalyq jáne 14 oblystyq salalyq kásibı odaq, 18 myń bastaýysh kásipodaq uıymy bar.