Qazaqstannyń eń erekshe bes kitaphanasy qaıda ornalasqan
1. Eń alǵashqy kitaphana
Elimizdegi kópshilikke arnalǵan tuńǵysh kitaphana 152 jyl buryn (1871 jyly) Oral qalasynda ashyldy. Kitaphana ǵımaraty qalanyń eń kórnekti tarıhı-mádenı jáne sáýlet eskertkishi retinde tanymal. Búginde Juban Moldaǵalıev atyndaǵy Batys Qazaqstan oblystyq ámbebap ǵylymı kitaphana óńirdegi 360 kitaphananyń ádistemelik ortalyǵy sanalady.
2. Eń kóp qoljazba men sırek qorlar saqtalǵan kitaphana
Elimizdegi sırek qorlar men qoljazbalarǵa baı kitaphana - Abaı atyndaǵy Abaı oblystyq ámbebap kitaphanasy. Kitaphananyń turaqty oqyrmandarynyń qatarynda qazaqtyń kemeńger aqyny Abaı Qunanbaıuly da bolǵan. Munda 4 myńnan astam óte sırek kezdesetin kitap saqtalǵan. Hronologııalyq turǵydan ádebıetter tizimi XVIII ǵasyrdyń ekinshi jartysy men XIX ǵasyrdy qamtıdy.
3. Eń kóp kitap qory bar kitaphana
Elimizdegi kitap qory eń kóp kitaphana – Almaty qalasyndaǵy Qazaqstan Respýblıkasynyń Ulttyq kitaphanasy. Munda 7 mln-nan astam kitap bar. 1910 jyly irgetasy qalanǵan kitaphana 1931 jyly Úkimet qaýlysyna sáıkes Qazaq SSR-niń Memlekettik kópshilik kitaphanasy bolyp qaıta qurylǵan. Búginde Ulttyq kitaphana respýblıka kitaphanalarynyń ǵylymı-ádistemelik ortalyǵy retinde tanymal.
4. Eń zamanaýı kitaphana
Almaty qalasyndaǵy Jambyl atyndaǵy jasóspirimder kitaphanasy modernızatsııadan keıin «Eń zamanaýı kitaphana» ataǵyna ábden laıyq.
Kitaphana janynan kovorkıng-ortalyq ashylǵaly bul jer jastardyń bas qosatyn ádebı jáne mádenı demalys ornyna aınalǵan. Kitaphana OpenSpace formatynda qyzmet kórsetedi. Oqyrmandarǵa qolaıly jaǵdaı jasaý úshin munda Silent zone (tynysh aımaq), Single zone (jeke aımaq), Public spase (toptyq aımaq), Atrium (atrıým) qarastyrylǵan.
5. Eń tsıfrly kitaphana
Astanadaǵy QR Ulttyq akademııalyq kitaphanasy tsıfrly jáne elektrondy kontent boıynsha elimizdegi eń úzdik kitaphana sanalady. 2004 jyly ashylǵan kitaphana «Qazaqstandyq elektrondyq memlekettik kitaphana qory» (kazneb.kz) jobasyn júzege asyryp otyr. Atalǵan portalǵa elimizdiń mádenı-ádebı, tarıhı qundylyqtaryna qatysty 70 myńnan asa elektrondy kontent engizilgen.