Qazaqstannyń «Elektrondyq Úkimeti» álemde 38-shi orynda tuǵyrlandy

ASTANA. 19 naýryz. QazAqparat - Qazaqstannyń «Elektrondyq Úkimeti» álemde 38 -shi orynda tuǵyrlandy. Bul týraly búgin Úkimet otyrysynda QR Kólik jáne kommýnıkatsııa mınıstri Asqar Jumaǵalıev málim etti.

Mınıstrdiń sózine qaraǵanda, ótken jyly halyqqa qyzmet kórsetý ortalyqtary arqyly 15 mln. astam qyzmet kórsetilgen. Bul kórsetkish 2011 jylmen salystyrǵanda 31 paıyzǵa joǵary. Qazirgi ýaqytta HQKO-da memlekettik qyzmetterdiń 113 túri usynylady. Al, «Elektrondyq Úkimet» arqyly 10,7 mln. qyzmet kórsetilgen. Bul kórsetkish 2011 jylǵa qaraǵanda 28 paıyzǵa joǵary bolyp otyr.

«Nátıjesinde BUU búginde Qazaqstan «Elektrondyq Úkimet» júıesin qalyptastyrǵanyn atap ótýde. Bul turǵydaǵy damý boıynsha bizge 38-shi oryn berildi. Al, elektrondyq qatysý boıynsha elimiz Sıngapýrmen qatar kele jatyr, sondaı-aq Onlaın qyzmetteri boıynsha 14-shi oryndamyz»,-dedi vedomstvo basshysy.