Qazaqstannyń EAEO elderimen saýda-sattyq kólemi arta túsýde

ASTANA. QazAqparat - Aǵymdaǵy jyldyń qańtar-qyrkúıek aılarynda Qazaqstannyń Eýrazııalyq ekonomıkalyq odaq elderimen ózara saýda-sattyq kólemi 30 paıyzǵa artty. 

Bul jaıynda QR Ulttyq ekonomıka mınıstrliginen málim etti, dep habarlaıdy QazAqparat.

«2017 jylǵy qańtar-qyrkúıektegi Qazaqstan Respýblıkasynyń EAEO elderimen ózara saýdasy 12 373,7 mln AQSh dollaryn qurap, 2016 jylǵy qańtar-qyrkúıekpen salystyrǵanda 30,0 paıyzǵa artty. Onyń ishinde   eksport - 3 718,0 mln AQSh dollary (33,9  paıyzǵa ósti), ımport - 8 655,7 mln AQSh dollary (28,4 paıyzǵa ósti) boldy», delingen mınıstrlik aqparatynda.

Sonymen qatar vedomstvo málimetinshe, Qazaqstannyń EAEO elderimen syrtqy saýda  aınalymy jalpy kóleminde Reseı Federatsııasynyń úlesi 92,0, Qyrǵyzstan Respýblıkasy - 4,4, Belarýs Respýblıkasy - 3,6 paıyzǵa teń.