Qazaqstannyń EAEO elderimen aradaǵy saýda aınalymy artqan

NUR-SULTAN. QazAqparat – Qazaqstannyń jarty jyldaǵy EAEO elderimen aradaǵy saýda aınalymy 12,5 mlrd-qa jetti, dep habarlaıdy QazAqparat tilshisi Ulttyq statıstıka bıýrosyna silteme jasap.

«Qańtar-maýsym aılary aralyǵynda Qazaqstannyń EAEO elderimen ózara saýdasy 12 mlrd 571,8 mln dollar boldy. Byltyrǵy jyldyń dál osy kezeńimen salystyrǵanda saýda-sattyq 5 paıyzǵa kóbeıdi. Onyń ishinde eksport kólemi – 3 mlrd 733,9 mln dollar. Bul – ótken jylmen salystyrǵanda 0,2 paıyzǵa az. Alǵ qańtar-maýsym aralyǵynda Qazaqstan 8 mlrd 837,9 mln dollarǵa taýar ımporttaǵan. Byltyrǵa qaraǵanda ımport kólemi 7,3 paıyzǵa kóp.

EAEO elderine ásirese alıýmınıı oksıdi, alıýmınıı gıdroksıdi kóp eksporttaldy. Bul baǵytta 2,9 ese ósim baıqaldy. Sonymen qatar, kúıdirilgen pırıt, temir keni men kontsentrattardy shet memleket naryǵyna shyǵarý kólemi 62,8 paıyzǵa tómendedi.

Qańtar-maýsym aralyǵyndaǵy EAEO elderinen Qazaqstan untaqtalǵan jáne untaqtalmaǵan kúnbaǵys tuqymdaryn kóp ımporttady. Al, kólik ımporty 61,1 paıyzǵa azaıdy», - delingen bıýronyń resmı habarlamasynda.

Qazaqstannyń EAEO elderimen syrtqy saýda aınalymynda Reseı Federatsııasy (saýda aınalym úlesi – 92,6 paıyz) kósh bastap tur. Odan keıin Qyrǵyz Respýblıkasy (saýda aınalym úlesi – 3,9 paıyz), Belarýs (saýda aınalym úlesi – 3,4 paıyz) jáne Armenııa (saýda aınalym úlesi – 0,1%).

Buryn habarlaǵanymyzdaı, bıylǵy 5 aıda Qazaqstannyń eksporty 37,2 paıyzǵa artyp, 34,2 mlrd dollarǵa jetti.