Qazaqstannyń Dúnıejúzilik baspasóz bostandyǵy reıtıngindegi pozıtsııasy jaqsartylmaq

ASTANA. QazAqparat – Qazaqstannyń Dúnıejúzilik baspasóz bostandyǵy reıtıngindegi pozıtsııasyn jaqsartý josparlanyp otyr. Bul týraly «Ashyq» NQA portalynda jarııalanǵan «Internet-jarnama jáne onlaın-platformalar týraly» Zań jobasyna qosymsha konsýltatıvtik qujatynda jazylǵan, dep habarlaıdy QazAqparat tilshisi.

Aıta keteıik, Aqparat jáne qoǵamdyq damý mınıstrligi ınternettegi jarnama men onlaın platformalardyń qyzmetin retteıtin jańa zań ázirleýdi usyndy. Óıtkeni, qazirgi zańnama talaptary quqyq aıasynda jumys isteıtin kásibı jýrnalıster men rettelmeıtin onlaın platformalar arasyndaǵy básekelestikte teń múmkindik bermeıdi.

Sondyqtan, qabyldanýy múmkin zań atalǵan máselelerdi sheshýde basty qural retinde qoldanylady. Sondaı-aq, onyń sheńberinde elimizdegi BAQ-tyń álemdik reıtıngidegi pozıtsııasyn jaqsartý josparlanǵan.

«Shekarasyz reporterler» halyqaralyq úkimettik emes uıymy qalyptastyratyn Dúnıejúzilik baspasóz bostandyǵy ındeksinde Qazaqstan Respýblıkasyn bir pozıtsııaǵa ilgeriletý kózdelgen. Atap aıtqanda, Qazaqstan 2022 jyly reıtıngide 122-orynda boldy», - delingen «Ashyq» NQA portalynda jarııalanǵan konsýltatıvtik qujatta.