Qazaqstannyń desanttyq-shabýyldaý áskerleri kásibı merekesin atap ótip jatyr
2017 jyly qazirgi zamanǵy qurylymmen Desanttyq-shabýyldaý áskerleri bolyp qaıta uıymdastyryldy, dep habarlaıdy QazAqparat QR Qorǵanys mınıstrligine silteme jasap.
Ár jyldary bul áskerge general-maıor Ýálı Elamanov, general-polkovnık Sáken Jasuzaqov, general-leıtenant Murat Máıkeev, general-maıor Ádilbek Aldabergenov, general-maıor Dáýlet Ospanov, general-maıor Almaz Jumakeev, general-maıor Qaıdar Qaraqulov, general-maıor Qanysh Ábýbákirov basshylyq etti.
Búginde desanttyq-shabýyldaý áskerlerin general-maıor Mereke Kúshikbaev basqarady. Qazirgi desanttyq-shabýyldaý áskerleri – utqyrlyǵy joǵary jáne sońǵy úlgidegi tehnıkamen jaraqtalǵan, jaýyngerlik rette de, negizgi kúshterden alysta da, onyń ishinde qarsylas tylynda da mindetterdi oryndaýǵa qabiletti ásker. Onyń quramynda jaýyngerlik áleýetin desanttyq-shabýyldaý, artıllerııalyq, shabýyldaý, barlaý, bitimgershilik quramalary, bólimderi men bólimsheleri bar.
Desanttyq-shabýyldaý áskerleri bitimgershilik qyzmetke de zor úles qosýda. 2003-2008 jyldary «Qazpolktiń» áskerı qyzmetshileri Iraktaǵy bitimgershilik mıssııaǵa qatysty. 2018 jyldan bastap «Qazpolk» pen «Tilendıev» bitimgershilik daıarlyq ortalyǵy bazasynda «BUU-nyń Lıvandaǵy ýaqytsha kúshteri» úshin qazaqstandyq kontıngent daıarlanyp jatyr.
Desanttyq-shabýyldaý áskerleri barlyq, onyń ishinde halyqaralyq oqý-jattyǵýlarǵa belsendi qatysady. Armııalyq halyqaralyq oıyndar saıystarynda qol jetkizgen kórsetkishteri joǵary.
«Desantshy-jaýyngerler árqashan joǵary daıarlyq deńgeıin, kásibı sheberligin, qıyn da kúrdeli mindetterdi oryndaýǵa qabiletti ekenin kórsetýde. Bul áskerde qyzmet etýdiń qaı kezeńde de abyroı-bedeli asqaq. Bólimder men bólimshelerdi jasaqtaý qatań irikteý arqyly júrgiziledi, al merzimdi qyzmet áskerı qyzmetshileriniń sporttyq razrıady bar jáne psıhologııalyq turǵydan óte tózimdi bolyp keledi», - dep habarlady Qorǵanys mınıstrliginiń baspasóz qyzmeti.