Qazaqstannyń densaýlyq saqtaý salasyna quıylǵan ınvestıtsııa kólemi artty
Bul QR ınvestporfeliniń 1,5%-y ǵana, degenmen, byltyrǵy jylmen salystyrǵanda ol (0,9%) aıtarlyqtaı artqan, dep habarlaıdy QazAqparat Finprom portalyna silteme jasap.
Bıylǵy jyldyń segiz aıynyń qorytyndysy boıynsha eldegi negizgi kapıtalǵa quıylǵan ınvestıtsııalar kólemi bir jylda 4,3%-ǵa tómendep (QQK-93,9%), 7 trln teńgeni qurady.
Soǵan qaramastan densaýlyq saqtaý men áleýmettik qyzmet sektoryna quıylǵan kapıtal salymy sońǵy jyldary eń joǵary kórsetkishke jetti - 55,8% (QQK - 154%): bıylǵy jyldyń qańtar-tamyzynda bul salaǵa 103,6 mlrd teńge ınvestıtsııa quıyldy. Jalpy ınvestportfeldegi sektordyń úlesi 1,5%-dy qurady. Bir jyl buryn bul kórsetkish 0,9% bolatyn.
Densaýlyq saqtaý salasyna salynǵan ınvestıtsııalar kóleminiń artýyna jergilikti bıýdjetten túsken salymdar aıtarlyqtaı áser etti. Osylaısha, segiz aı ishinde soma 2,5 eseden astamǵa nemese ótken jyldyń osy kezeńimen salystyrǵanda 27,7 mlrd teńgege ulǵaıyp, 43,7 mlrd teńgeni qurady.
Budan basqa, qaryzǵa alynǵan qarajat esebinen quıylǵan ınvestıtsııalar kólemi aıtarlyqtaı ulǵaıdy, olardyń somasy jylyna 16 ese, 16,5 mlrd teńgege deıin ósti (bir jyl buryn — 1,1 mlrd teńge). Bıznestiń jeke qarajaty esebinen quıylǵan ınvestıtsııalar 28,9 mlrd teńgeni qurady — ótken jyldyń osy kezeńimen salystyrǵanda 28,6%-ǵa artyq
Sonymen qatar, respýblıkalyq bıýdjetten bólingen ınvestıtsııalar 44,9%-ǵa tómendep, 13,9 mlrd teńgeni qurady (bir jyl buryn – 25,3 mlrd teńge). Bank nesıeleri 64,7%-ǵa 562,3 mln teńgege deıin azaıdy.
Óńirler ishinde Densaýlyq saqtaý jáne áleýmettik qyzmet salasyna kúrdeli salymdardyń eń kóp somasy Almatyda: 19,1 mlrd tg — ótken jylmen salystyrǵanda 2 esege artyq (9 mlrd tg).
Sektordaǵy eń kóp ınvestıtsııa kólemi boıynsha kósh bastap turǵan óńirlerge Qaraǵandy (11,6 mlrd teńge) jáne Almaty (10,6 mlrd teńge) oblystary kirdi.
Bestikti Nur-Sultan (10,5 mlrd tg) men Shyǵys Qazaqstan oblysy (9,7 mlrd tg) túıindep tur.