Qazaqstannyń BUU QK tóraǵalyǵy: Gaagada qorytyndy jıyn ótti

ASTANA. QazAqparat - Gaaga qalasyndaǵy Qazaqstan Respýblıkasynyń Nıderland Koroldigindegi Elshiliginde QR-dyń BUU Qaýipsizdik Keńesindegi tóraǵalyǵynyń aıaqtalýyna oraı dóńgelek ústel ótti. Bul týraly QazAqparat Elshiliktiń baspasóz qyzmetine silteme jasap habarlaıdy.

Іs-sharaǵa Nıderland Syrtqy ister mınıstrliginiń BUU Qaýipsizdik Keńesiniń máseleleri boıynsha arnaıy tobynyń úılestirýshisi Robert Dresen, BUU Qaýipsizdik Keńesiniń turaqty emes múshe elderiniń elshileri, «Klıngendaıl» jetekshi taldaý ortalyǵynyń sarapshylary jáne basqa da Nıderlandtyq akademııalyq toptarynyń belgili ókilderi qatysty.

Talqylaý barysynda, Elshi Maǵjan Іlııasov, Qazaqstan tóraǵalyǵynyń sheńberinde brıfıngter jáne pikirtalas úlgisinde otyzǵa jýyq otyrystar ótkizilip, olardyń qorytyndylary boıynsha Keńes tóraǵasynyń qararlary jáne málimdemeleri qabyldanǵanyn atap ótti. Qazaqstandyq dıplomat QR Prezıdenti N.Nazarbaevtyń 18 qańtardaǵy saıası úndeýiniń negizgi erejelerine erekshe nazar aýdaryp, olardyń ishinde Qazaqstannyń BUU Qaýipsizdik Keńesindegi jumysynyń saıası baǵdarlary men tájirıbesi de qamtylǵanyn baıandady.

Sonymen qatar, Qazaqstannyń terrorızmge jol bermeýge qatysty kásibı kodeksi jobasyn júzege asyrý boıynsha joǵary deńgeıdegi arnaıy is-shara ótkizgenin talqylady. BUU jáne terrorızmge qarsy Qaýipsizdik Keńesi basshylyǵy, júzge jýyq múshe memleketter delegatsııalarynyń ókilderi atalǵan kodekstiń ózektiligi men mańyzdylyǵyn erekshe baǵalap, qujatty qoldady.

Dóńgelek ústeldiń barlyq qatysýshylary QR BUU Qaýipsizdik Keńesiniń tóraǵasy retinde atqarǵan qyzmetin joǵary baǵalap, ásirese Aýǵanstandaǵy jaǵdaıdy turaqtandyrý úshin jasalǵan  áreketter erekshe atalyp ótti.

19 qańtarda mınıstrlik pikirtalastardyń qarsańynda, jeti jyldan beri uıymdastyrylyp otyrǵan BUU Qaýipsizdik Keńesi músheleriniń Aýǵanstanǵa sapary bul eldiń syrtqy jáne ishki turaqtylyǵy men órkendeýin nasıhattaý úshin mańyzdy bolǵany aıtyldy. Sonymen qatar, Qazaqstan jáne Memleket basshysynyń jappaı qyryp-joıý qarýlaryn taratpaý isine eleýli úles qosqandyǵy atalyp ótti. Kezdesý barysynda BUU Qaýipsizdik Keńesiniń kelesi turaqty emes músheleriniń 2018-2019 jj. kún tártibinde josparlanǵan áreketteri jóninde aýqymdy pikirtalas boldy.

Kezdesý nátıjelerin Nıderland Syrtqy ister mınıstrliginiń BUU Qaýipsizdik Keńesiniń máseleleri boıynsha arnaıy top úılestirýshisi Robert Dresen qorytyndylady.

«Qazaqstan Qaýipsizdik Keńesiniń tóraǵalyǵy deńgeıinde álemdik qoǵamdastyqqa ózekti máselelerdi sheshýdegi syndarly áreketterge ıkemdiligin kórsete bildi.  Atap aıtqanda, Aýǵanstandaǵy qaýipsizdikti nyǵaıtý mańyzdy óńirlik ekonomıkalyq jobalardy, onyń ishinde ınfraqurylymdy damytý, elektrmen jabdyqtaý, saýda-sattyqty keńeıtý jáne tranzıt qyzmetterin jolǵa qoıý syndy jobalaryn iske asyrýǵa jol ashady», -dedi Robert Dresen.