Qazaqstannyń BUU-ǵa múshe bolýynyń 25 jyldyǵyna arnalǵan poshtalyq marka qoldanysqa engizildi

ASTANA. QazAqparat - QR Syrtqy ister mınıstrliginde Qazaqstan Respýblıkasynyń Birikken Ulttar Uıymyna qosylýynyń jáne Memleket basshysy Nursultan Nazarbaevtyń Azııadaǵy ózara is-qımyl jáne senim sharalary jónindegi keńesti (AÓSShK) shaqyrý týraly bastamasynyń 25 jyldyq mereıtoılaryna arnalǵan poshtalyq markalardy engizý rásimi ótti.

Bul týraly vedomstvonyń baspasóz qyzmeti habarlaıdy.

Rásimge syrtqy ister mınıstriniń orynbasary Erjan Ashyqbaev pen «Qazposhta» aktsıonerlik qoǵamynyń atqarýshy dırektory Sáýle Egemberdıeva qatysty.

«BUU-ǵa múshe bolǵan jyldary Qazaqstan memleketterdiń halyqaralyq qaýymdastyǵyna sátti enýmen ǵana shektele qoımaı, onda salmaqty orynǵa ıelendi. Túrli jyldary elimiz BUU alańshalarynda álemdik qoǵamdastyq talap etken bastamalardy, sonyń ishinde AÓSShK-ni iske asyrdy», - dedi E. Ashyqbaev alǵysózinde.

Sondaı-aq, syrtqy saıası vedomstvo basshysynyń orynbasary «shırek ǵasyr ishinde álemdik saıasatta bedeldi oryndy ıelengen AÓSShK Azııadaǵy qaýipsizdik pen senim sharalarynyń tıimdi quraly mártebesin alýyna tolyqtaı negizi bar» ekenin atap ótti.

«Umytylmas jáne mereıtoılyq datalar» serııasynan usynylǵan poshtalyq markalar tórtboıaýly ofsetti baspamen, 20 markadan turatyn markaly paraq túrinde jasalǵan. Taralymy 10 000 danany quraıdy.