Qazaqstannyń búkil aımaqtarynyń tynys-tirshiligin tanystyratyn kórme ótedi

AQTAÝ. QazAqparat - Qazirgi tańda kórmege daıyndyq jumystary júrip jatyr. Bul týraly Mańǵystaý oblystyq qoǵamdyq kommýnıkatsııa ortalyǵynda ótken brıfıngte qoǵam qaıratkeri, jazýshy Jan Aqjanov habarlady.

Spıkerdiń aıtýynsha, kórme 18 qyrkúıekte Nur-Sultan qalasynan bastaý alyp, Qazaqstannyń barlyq oblysynda jalǵasady.

- Barshamyzǵa belgili, bizdiń elimiz álemdegi eń úlken 10 eldiń qatarynda. Jerimiz qandaı keń, baıtaq bolsa, halqymyz ben tabıǵatymyz da san alýan, baı kolorıtti. Jobany uıymdastyrýdaǵy maqsatym - ár óńirdiń kórikti, tarıhı jerlerin, eńbek adamdaryn fotosýretter arqyly basqa aımaqtarǵa tanystyrý. Sonymen birge, halyqtyń óz eline, jerine degen súıispenshiligin arttyrý. Kórmege kelgen turǵyndar elimizdiń ár aýmaǵymen tanyspaq. Qazirgi tańda jobanyń daıyndyq jumystary bastalyp ketti, - dedi Jan Aqjanov.

Spıkerdiń aıtýynsha, ár óńirden jınalǵan fotosýretterdi qosa eseptegende, 300-deı foto jınalmaq.

Ári qaraı sýretter irikteýden ótip, kórmede 70-ten astam fotosýret qoıylady. Sondaı-aq, kórmege memlekettik qyzmetshilerdiń ımıdjin arttyrý maqsatynda túsirilgen fotolar da bolady.

Sonymen qatar, kórermender ár fotosýrettiń janyndaǵy QR kodqa uıaly telefon kamerasyn aparý arqyly, sýrettegi beıne jóninde tolyqtaı aqparat ala alady.

Kórmege fotosýretterdi jınaý 4 shilde kúni Atyraý qalasynda bastalyp, Shymkent, Taraz, Qyzylorada oblysynda bolǵan.

Onda kıeli eskertkishterden bastap, ǵarysh aılaǵy, ártúrli sala mamandary men kórikti jerlerdi túsirgen.

Bizdiń óńirimizde de Beket ata jer asty meshitinen bastap, oblystyq kitaphana men mýzeıde, munaı kenishteri janynda fotosessııa ótpek.

Brıfıng barysynda Mańǵystaý oblystyq memlekettik qyzmet isteri departamenti basshysynyń mindetin atqarýshy Erlegen Meńdalıev ózi qyzmet atqaratyn aýmaqtyq departamentte oblys, aýdan ákimdikterimen birlesip, jobanyń óńirlik deńgeıdegi is-sharalaryna atsalysyp jatqanyn jetkizdi.