Qazaqstannyń bolashaǵyn jastarǵa senip tapsyrýǵa bolady - Nursultan Nazarbaev

ASTANA. QazAqparat - QR Prezıdenti Nursultan Nazarbaev jastarǵa «Uly dalanyń jeti qyry» atty maqalasyn ne úshin jazǵanyn aıtyp berdi, dep habarlaıdy QazAqparat tilshisi.

«Biz aspannan salbyrap túsken joqpyz. 1991 jyly Táýelsizdik alsaq ta, bizdiń úlken ári tereń tarıhymyz bar. Sol sebepti senderge «Uly dalanyń jeti qyry» atty maqalamdy usyndym. Aǵylshyndar Artýr koroli týraly aıtady. Qytaıdyń 5 myń jyldyq tarıhy bar deıdi. Bizdiń de tarıhymyz bar. Sony jalǵastyryp jatqan urpaqpyz. Jastar óz tarıhyn aıta bilýi kerek. Ǵundar bar. Odan keıingi ata-babamyz - kóne túrkiler. Biz - solardyń urpaǵymyz. Kóne túrkiler Altaı men Qara teńizdiń arasyn alyp otyrǵan. Al Atılla - bizdiń qypshaq. Biz - sol batyr babanyń urpaǵymyz. Sony bilýimiz kerek», - dedi N.Nazarbaev Jastar jylynyń saltanatty ashylý rásiminde.

Prezıdenttiń aıtýynsha, jastar óz tarıhyn maqtan tutýy qajet. Sebebi kóshpeliler de álem órkenıeti men mádenıetine óz úlesin qosty. Al osy kóshpelilerdiń urpaǵy - qazirgi jastar óz elin joǵary bıikterge jetkize alady degen nyq senim bar.

«Qazaqstannyń bolashaǵyn jastarǵa senip tapsyrýǵa bolady dep oılaımyn. Biz tekke jumys istegen joqpyz. Biz durys urpaqty tárbıeleı aldyq degen senimdemin. Elimizdiń bolashaǵy úshin alańdamaımyz. Sender Qazaqstandy damyǵan 30 eldiń qataryna shyǵara alasyzdar», - dep atap kórsetti N.Nazarbaev.

Aıta keteıik, búgingi jıynda Prezıdent aýylǵa barǵan jastardyń járdemaqysyn kóbeıtýdi tapsyrdy.

Budan bólek, Memleket basshysy aýyl sharýashylyǵyn damytýdyń mańyzdylyǵyn jetkizdi.