Qazaqstannyń boks mektebi búkil Azııany órge súıreı alady - Qazaqstannan alǵashqy álem chempıony V.Rachkov
«Meniń jan-júregim Qazaqstannan esh ajyraǵan emes. Men respýblıkadaǵy oqıǵalardyń qalaı órbip jatqandyǵyn jiti nazarda ustap otyramyn», - dedi V.Rachkov.
Osy rette ol Pavlodarda ótip jatqan jasóspirimder arasyndaǵy bokstan Azııa chempıonatyna oń baǵasyn berip, jas qazaqstandyq boksshylarǵa óz keńesin de berdi.
«Balalar senimdi túrde jeńiske qol jetkizý úshin urystyń ońtaıly túrin tabýy tıis. Soqqy jasaý kerek, sonda jeńis sende bolady. Kim kóp soqqy jumsasa, sol jeńiske jetedi», - degen tanymal boksshy jas boksshylarǵa jeńis tiledi.
Osy oraıda V.Rachkov qazaqstandyq boks mektebiniń sapasy óte joǵary ekendigin basa atap ótti. Onyń paıymynsha, sońǵy birneshe jyl boıy úzdik nátıje kórsetip kele jatqan Qazaqstan boksyna Olımpıada oıyndarynda búkil Azııany órge súıreýge biregeı múmkindik týyp otyr.
«Qazaqstanda bokspen aınalysatyndardyń leginiń kóptigi ári oǵan zor qyzyǵýshylyq tanytýy, bul sport túriniń damýyna qoldaý kórsetý deńgeıiniń joǵary bolýy sebepti qazaqstandyq boks azııalyq bokstyń kóshbasshysyna aınaldy. Sondyqtan da, Qazaqstannan Olımpıada chempıondary birneshe jyl boıy turaqty túrde shyǵyp keledi. Olar búkil azııalyq boksty kóterýge qaýqarly», - dedi ol.
Bul rette dańqty boksshy Azııa boks konfederatsııasynyń prezıdenti Serik Qonaqbaevtyń elimizde boks mektebiniń qalyptasýyna, joǵary deńgeıge kóterilýine zor úles qosqandyǵyn aıryqsha atap ótti.
«Búginde Serik Kerimbekulynyń qazaq boksyn aldyńǵy lekke shyǵarýǵa zor múmkindigi bar. Onyń tıimdi basshylyǵynyń arqasynda búgingi qazaqstandyq boks mektebi jınaqtaǵan mol tájirıbe men jastar tarabynan bul sportqa qyzyǵýshylyq Qazaqstannyń búkil Azııa elderin ilgeriletýine jol ashady dep oılaımyn. Buǵan qosa, qazaqstandyq boksshylar kóshbasshy bolyp qana qoımaı, búkil azııalyq boksty sońynan ertýge mindetti de», - dedi V.Rachkov.
Aıta keteıik, Valerıı Rachkov 1956 jyly 24 sáýirde Almaty qalasynda dúnıege kelgen. 12 jasynan bokspen aınalysyp, «Dınamo» sport qoǵamynyń jergilikti sektsııasynda Stanıslav Boldyrevtiń qol astynda jattyqqan.
Ol 1973 jyly Búkilodaqtyq jastar oıynynda alǵashqy jeńisine qol jetkizdi. Al 1976 jyly ekinshi orta salmaqta bokstan KSRO chempıony ataǵyn jeńip aldy. Sol jyly Monrealda ótken jazǵy Olımpıada oıyndaryna joly túsip, eki qarsylasynan basym túskenimen úshinshi kezdesýinde Monreal Olımpıadasynyń chempıony atanǵan Iohen BahFeldke ese jiberip aldy.
Al odan keıingi eki jyl boıy V.Rachkov birde-bir ret jeńilistiń aşy dámin tatpaı KSRO birinshiliginde top jaryp júrdi. 1978 jyly Belgradta ótken álem chempıonatynyń shırek fınalynda joǵaryda atap ótken I.Bahfeldpen judyryq túıistirip, jeńiske jetken edi. Ol eńbek sińirgen sport sheberi, sonymen qatar «dańqty boksshy» ataǵyna da ıe bolǵan.
Sporttyń mansap jolyn aıaqtaǵannan keıin Valerıı Rachkov 4 jyl boıy Almatyda balalar jattyqtyrýshysy bolyp jumys istedi. Odan keıin Máskeýge qonys aýdaryp, 1984-1987 jyldary aralyǵynda máskeýlik «Dınamo» sport qoǵamynda jas boksshylardy jattyqtyrdy. Keıinirek KSRO jasóspirimder quramasynyń jattyqtyrýshysy bolǵan. AIBA-nyń halyqaralyq sanattaǵy tóreshisi mártebeli ataǵy bar.