Qazaqstannyń bitimgerlik mıssııasyn Úndistannyń áskerıleri úıretýde

NUR-SULTAN. QazAqparat - Úndistan Respýblıkasy Qarýly kúshteriniń mobıldi-jattyqtyrý toby ekijaqty áskerı yntymaqtastyq sheńberinde Lıvanǵa attanatyn ekinshi qazaqstandyq bitimgerlik rotasynyń jeke quramyna sabaq ótkizýde, depe habarlaıdy QazAqparat QR Qorǵanys mınıstrligine silteme jasap.

Sabaqtar baǵdarlamasy bitimgerlik mıssııalardyń negizgi túrleri boıynsha aýqymdy teorııalyq blokty, sondaı-aq áskerı-azamatyq qatynastyń quqyqtyq aspektileri men qaqtyǵys aımaǵynda beıbit halyqtyń qorǵalýyn qamtıdy.

Qazaqstandyq bitimgerler oqý barysynda BUU-nyń mıssııalarynda qajet qujattardy, kúshterdi qoldaný qaǵıdalary men dırektıvalardy, operatsııalardyń tujyrymdamasyn, jaýyngerlik buıryqtar men t.b. úırenedi.

Teorııalyq blokty muqııat zerdelep, áskerı qyzmetshiler praktıkalyq sabaqtarda gýmanıtarlyq júkke ilesip júrý, ártúrli shıelenisterdi sheshý jónindegi tapsyrmalardy pysyqtaıdy, jedel bazany uıymdastyrý men kúzetý, blok beketterdi óristetý men BUU-nyń bitimgerlik mıssııasy sheńberindegi ózge de tapsyrmalardy biletinderin qaıtalaıdy.

Qazaqstandyq bitimgerler úshin trenıngtiń sharyqtaý shegi oqý-jattyǵý polıgondarynyń birinde ótetin «Kógildir dýlyǵalar» oqý-jattyǵýy bolady.

Aıta keterligi, qazaqstandyq bitimgerlik polkiniń alǵashqy qurama rotasynyń áskerı qyzmetshileri 2018 jylǵy qazannan bastap Lıvan Respýblıkasynda bitimgershilik mıssııany oıdaǵydaı oryndap jatyr. 120 áskerı qyzmetshi BUU-nyń «Beıbitshilik úshin qyzmet» medaldarymen marapattaldy. Qazaqstandyq bitimgerlerdiń rotatsııasy 2019 jylǵy mamyrda ótedi.