Qazaqstannyń birneshe aımaǵynda sý tasqyny bolyp jatyr

NUR-SULTAN. QazAqparat - Aǵymdaǵy táýlikte óńirlerde turǵyn úılerdi sý basýǵa jol berilgen joq, dep habarlaıdy QazAqparat tilshisi TJ mınıstrliginiń resmı saıtyna silteme jasap.

«Qazirgi ýaqytta Aqmola jáne Aqtóbe aımaqtaryndaǵy oblystyq mańyzy bar joldardyń 4 ýchaskesinde, Qaraǵandy, Aqmola, Aqtóbe, Qostanaı oblystaryndaǵy jergilikti mańyzy bar avtojoldardyń 11 ýchaskesinde, Aqtóbe oblysynyń jergilikti mańyzy bar ýchaskesindegi bir kópirde sý tasqyny bolyp jatyr», - delingen vedomstvonyń málimetinde.

Aqmola, Aqtóbe, Qaraǵandy oblystarynda, Nur-Sultan qalasynda jergilikti atqarýshy organdar men TJM kúshterimen aýla aýmaqtary men kóshelerden 126,6 myń tekshe metr erigen qar sýy sorylǵan. Aqmola, Shyǵys Qazaqstan, Aqtóbe, Qaraǵandy oblystarynda ınertti materıaldary bar 4 895 qap tóseldi.

Derekkózde bul jumystarǵa TJM, ІІM, jergilikti atqarýshy organdardan, úkimettik emes uıymdardan 657 adam, 156 tehnıka, 74 sý sorý quraly jáne 5 júzý quraly jumyldyrylǵany aıtylady.

Aqmola jáne Shyǵys Qazaqstan oblystarynda sý tasqynyna qarsy is-sharalarǵa (qaptar tóseý, topyraq úıip bekitilgen jerlerdi nyǵaıtý, erigen qar sýyn sorý) 52859 jáne 68303 áskerı bólimderiniń 55 qyzmetshisi men 6 tehnıkasy tartyldy.